२० पुष,काठमाण्डौ ।
भारतले नेपालस्थित आफ्नो दूतावासबाट २० करोडसम्म सिधैं आफु खुशी खर्च पाउने गरी द्धिपक्षीय सम्झौता भएपछि यसको चौतर्फी आलोचना भईरहेका बेला चर्चित सिने अभिनेता दिपकराज गिरीले भने भारतसँग दोस्ती गरेर मात्रै नेपालले वर्तमान अवस्थाबाट मुक्ति पाउने भन्दै अब राष्ट्रवादी नभई राष्ट्रघाती बन्नु पर्ने टिप्पणी गरेका छन् ।
भारतको आलोचना गर्ने वा भारतविरोधी कित्तामा उभिनुलाई नेपालमा बलियो राष्ट्रवादी मानिने सोचाईतर्फ लक्षित गर्दै गिरीले अब अवस्था परिवर्तनका लागि भारतसँग दोस्ती नै एकमात्रै विकल्प रहेको बताएका छन् । उनले सामाजिक संजालमा लेखेका छन्, धेरै भो राष्ट्रबादी भएको आज अलिकता राष्ट्घाती बनौ है? नेपालले बर्तमान अबस्था बाट मुक्ति पाउने एक मात्रै बिकल्प भारत संगको स्पष्ट र मजÞबूत दोस्ती नै हो ।
गिरीको यो अभिब्यक्तिमा मिश्रित प्रतिक्रियाहरु आइरहेका छन् । विदेश मन्त्री एस जयशंकरको नेपाल भ्रमणमा क्रममा महत्वपूर्ण ४ सम्झौताहरु भएका छन् । जसमा नेपालले बनाएको स्याटेलाइट भारतले प्रक्षेपण गरिदिने देखि १० वर्षमा १० हजार मेगावाट विद्युत भारतले खरिद गर्नेसम्म रहेका छन् ।
यसका साथै विदेशमन्त्रीले नेपाली क्रिकेट टिमलाई विश्वकप टि २० विश्वकपलाई आवश्यक सहयोग गर्ने भनी दिएको वचनको समेत प्रशंसा भईरहेको छ । यद्यपि भारतले अबदेखि नेपालमा २० करोड रुपैयाँसम्मका परियोजनामा सिधै खर्च गर्न पाउने बाटो खुलेको विषय भने निक्कै आलोचित बनेको छ ।
यो सहमतिपछि अब भारतले सिधै लगानी गर्ने पाउने विकास आयोजनाको रकमको सीमा ५ करोडबाट बढेर चार गुणा बढी अर्थात २० करोड पुगेको छ। यो सहमतिको तीव्र राजनीतिक नेताहरुबाट समेत आलोचना भइरहेको छ । प्रधानमन्त्री पुष्पकमल दाहालले भने नेपालस्थित भारतीय दुतावासले नेपालमा आफूखुशी २० करोड रुपैयाँ सिधै खर्च गर्न नपाउने बताएका छन् ।
शुक्रवार सिंहदरबारमा बसेको राज्य व्यवस्था तथा सुशासन समितिको बैठकमा सांसदहरुले उठाएको जिज्ञासाको जवाफ दिँदै उनले भारतीय विदेशमन्त्री एस जयशंकरको नेपाल भ्रमणको क्रममा बिहीवार काठमाडौंस्थित भारतीय दुतावासले सिधै २० करोडका योजनामा खर्च गर्न पाउने सम्बन्धी सम्झौता पत्रमा हस्ताक्षर भएको स्वीकार गर्दै दुतावासले सिधै मनलाग्दी खर्च गर्न नपाउने बताए ।
उनले भारतीय दुतावासले जहाँ मन लाग्छ त्यहीँ गएर लगानी गर्न नपाउने र त्यसको लागि प्रक्रिया रहेको बताएका छन् ।