Nepal Times
Nepal Times
1.4k
Shares

अमेरिकाबाट महावीरलाई दिने विमान कसले चोर्याे ?

अमेरिकाबाट महावीरलाई दिने विमान कसले चोर्याे ?

१२ माघ, एजेन्सी । 
नेपालस्थित महावीर पुनको आविष्कार केन्द्रलाई उपहार स्वरूप पठाउन लागेको एक सानो हवाई जहाज अमेरिकामै चोरी भएकोमा अहिले सो जहाज जलाइएको अवस्थामा भेटिएको छ । अमेरिकामा बसोबास गर्ने नेपाली व्यवसायी अनिश प्रधानले सो हवाई जहाज आविष्कार केन्द्रलाई सहयोग स्वरूप नेपाल पठाउन लागेका थिए ।

नेपाल पठाउनका लागि जहाजको इन्जिनसहितका पार्टपुर्जाहरू खोलेर एउटा कन्टेनरमा राखिएको थियो । जहाज राखिएको उक्त कन्टेनर नेपाल पठाउने प्रक्रिया पनि सुरु भइसकेको थियो । तर, नेपाल पठाउनुअघि नै कन्टेनरसहित उक्त जहाज चोरी भएको थियो । जहाजसहितको उक्त कन्टेनर जनवरीको पहिलो साता अमेरिकाको टोरेन्सबाट चोरी भएको समाचारमा जनाइएको छ ।

नेपाल पठाउने प्रक्रियामा रहेको विमानसहितको कन्टेनर चोरी भएपछि अनीशले स्थानीय प्रहरीमा उजुरी गरेका थिए । प्रहरीले अघि बढाएको अनुसन्धानका क्रममा एउटा ट्रकले उक्त कन्टेनरलाई तानेर लगेको सीसीटीभी फुटेजमा देखिएको थियो । तर, प्रहरीले पनि चोरको विषयमा थप केही पत्ता लगाउन सकेको थिएन ।

यो घटना उक्त क्षेत्रमा व्यापक चासोको विषय बनेको थियो । त्यसको केही समयपछि प्रहरीले सामाजिक सञ्जालमार्फत एउटा तस्बिर फेला पारेको थियो । उक्त तस्बिरमा एउटा कन्टेनर जलाइएको अवस्थामा देखिएको थियो । पछि अनिशले तस्बिरमा देखिएको कन्टेनर आफ्नै भएको पुष्टि गरेका थिए । ‘म निकै निराश भएको छु ।

चोरले गेटको ताला फुटाएर जहाजसहितको कन्टेनर चोरेर लग्यो,’ अनिशले भनेका छन् । उनले लामो समयदेखि अमेरिकामा साना प्लेनको पाइलटको प्रशिक्षण केन्द्र सञ्चालन गर्दै आएका छन् । उनी आफ्नो प्रशिक्षण केन्द्रमा विमानको मर्मत सम्भार पनि गर्छन् । अनीशका अनुसार, चोरी भएको प्लेन नेपालमा सञ्चालित आविष्कार केन्द्रमा पठाएर आर्थिक अवस्था कमजोर भएका युवाहरूलाई पाइलटको प्रशिक्षण दिने योजना बनाइएको थियो ।

‘मैले यो जहाज बनाउन निकै परिश्रम गरेको थिएँ । चोरले हामी धेरैको सपना भताभुङ्ग पारेको छ,’ सञ्चारकर्मीसँगको कुराकानीमा अनीशले भनेका छन् । नेपाल पठाउने तयारीमा रहेको उक्त जहाजको लम्बाई २२ फिट र चौडाइ ३५ फिट रहेको थियो । जहाजको तौल भने एक हजार पाउण्ड्सभन्दा बढी थियो । नेपाली वैज्ञानिक पुनले भने राष्ट्रिय आविष्कार केन्द्रमा ल्याएर सो जहाजमार्फत विमान निमार्णको अभ्यास गर्ने योजना गरेका थिए ।

केही महिना अघि अमेरिका गएका महावीरलाई अनिशले राष्ट्रिय आविष्कार केन्द्रलाई विमान दिने वचन दिएका थिए । उडान प्रशिक्षक प्रधानले लस एन्जलसमा आफ्नो ‘प्रधान एयरक्राफ्ट वर्क्स’ चलाइरहेका छन् । प्रधानसँग यस क्षेत्रमा काम गरेको दुई दशकको अनुभव छ । उनै प्रधानले नेपालमा विमान बनाउने र विमान उडाउन सिकाउने विद्यालय स्थापना गर्न वर्षौंदेखि काम गर्दै आइरहेका थिए ।

त्यसका लागि उनले ‘पाइपर पीए १५ नामक विमान तयार गरेका थिए । जसलाई उनले लस एन्जलसको टोरेन्समा भएको आफ्नो भाइको गोदाममा राखेका थिए । दुई जना बसेर उडाउन मिल्ने १९४० ताकाको पुरानो विमानलाई उनी आफैंले मर्मत गरेका थिए ।

एक दशक लागिपरेर बनाएको विमान नष्ट भएपछि प्रधानले आफ्नो मस्तिष्कमा केही नआएको, तर आँखाबाट आँसु आएको मिडियालाई सुनाएका छन् । त्यस्तै केही लोभी व्यक्तिका कारण आफ्नो सपना तुहिँदा दुःख लागेको जनाएका छन् । यद्यपि विमान पुनः बनाउन सकिने आशामा उनले ‘गो फन्ड मी’ मा सहयोग अभियान सुरु गरेका छन् ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.