१३ माघ,एजेन्सी ।
नेपाली यू–१९ टोलीका स्पिनर सुवास भण्डारीलाई अन्तर्राष्ट्रिय क्रिकेट परिषद् (आईसीसी) ले कारबाही गरेको छ । दक्षिण अफ्रिकामा जारी आइसिसी यू–१९ विश्वकपमा पाकिस्तानविरुद्धको खेलका दौरान भएको गल्तीका कारण उनीलाई कारबाही गरिएको जनाइएको छ । बुधबार दोस्रो खेलमा नेपाल पाकिस्तानसँग भिडेको थियो ।
सो क्रममा गरेको गल्तीका कारण स्पिनर भण्डारीलाई आईसीसीले कारबाही गरेको हो । उनलाई आईसीसीले एक डेमेरिट प्वाइन्ट दिएको हो । एक डेमेरिट प्वाइन्ट आगामी २४ महिनासम्म रेकर्डमा हुनेछ । पाकिस्तानविरुद्धको खेलमा १४औँ ओभरमा भण्डारीले शाहजैब खानलाई अनावश्यक रूपमा बल फ्याँकेपछि उनको काँधमा लागेको थियो ।
सोही कारण आईसीसीको आचारसंहिता २.९ अनुसार भण्डारीलाई कारबाही गरिएको हो । कुनै खेलाडीले २४ महिनाभित्र चार डेमेरिट प्वाइन्ट हुनेगरी गल्ती गरेमा दुई खेलमा प्रतिबन्ध लाग्नेछ । नेपाल पाकिस्तानसँग ५ विकेटले हारेको थियो भने पहिलो खेलमा न्युजिल्यान्डसँग ६४ रनले ।
शुक्रबार भने अफगानिस्तानलाई १ विकेटले हराउँदै नेपाल सुपर सिक्समा पुगेको छ । नेपालले ३ खेलमा २ अंक जोड्दा अफगानिस्तान भने अंकविहिन रहँदै पुछारमा रहेर विश्वकप यात्रा टुंग्यायो । अब सुपर सिक्समा नेपाल भारत र बंगलादेशसँग भिड्ने छ ।
समूह चरणमा प्रतिस्पर्धा गरेका १६ टोलीमध्य सुपर सिक्समा हरेक टोलीबाट ३–३ टोली पुग्ने प्रावधान रहेको छ । सुपर सिक्समा समूह ए र डी का टोलीले एक अर्कासँग खेल्दा समूह बी र सी का टोली पनि भिड्नेछन् । समूहमा पहिलो हुने टोलीले सुपर सिक्समा अर्को समूहको दोस्रो र तेस्रो सँग खेल्नेछन् ।
यस्तै दोस्रो हुनेले अर्को समूहको पहिलो र तेस्रो तथा तेस्रो हुने टोलीले अर्को समूहको पहिलो र दोस्रोसँग खेल्ने तालिका छ । यस्तोमा नेपालले अब सुपर सिक्सको समूह १ मा समूह ए को विजेता र उपविजेता सँग खेल्नेछ । समूह ए मा भारत शीर्ष २ स्थानमा रहने पक्का हुँदा बंगलादेशले पनि पछ्याउने सम्भावना रहेको छ ।
नेपालले अब ३१ जनवरीमा समूह ए को उपविजेता तथा फेब्रुअरी ३ मा समूह ए को विजेतासँग खेल्नेछ । सुपर सिक्समा समूहको अंक पनि जोडिने हुँदा नेपालले सेमिफाइनलमाको सम्भावना राख्न दुवै खेल जित्नुपर्नेछ । समूह १ र २ का शीर्ष दुई टोली सेमिफाइनलमा प्रवेश गर्नेछन् । चौथो स्थानको अफगानिस्तानले भने अब समूह ए को चौथो टोलीसँग खेल्नेछ ।
