१४ माघ , एजेन्सी ।
वेस्ट इन्डिजले डे–नाइट टेस्टमा अस्ट्रेलियालाई ८ रनले पराजित गर्दै २१ वर्षपछि टेस्ट क्रिकेटमा जित हासिल गरेको छ । आइतबार ब्रिसबेनको गाब्बा स्टेडियममा भएको खेलमा वेस्ट इन्डिजले दिएको २ सय १६ रनको लक्ष्य पछ्याएको अस्ट्रेलिया २ सय ७ रनमा अलआउट भएपछि वेस्टइन्डिजले रोमाञ्चक जित निकाल्यो ।
वेस्ट इन्डिजले ब्रिस्बेनमा ५६ वर्षपछि अस्ट्रेलियालाई हराएको हो । वेस्ट इन्डिजको जितमा समर जोसेफले ७ विकेट लिएका थिए । स्टिभ स्मिथ दोस्रो इनिङ्समा ९१ रन बनाएर नटआउट रहे । वेस्ट इन्डिजले पहिलो इनिङमा ३ सय ११ रन र दोस्रो इनिङ्समा १ सय ९३ रन बनाएको थियो ।
अस्ट्रेलियाले ९ विकेट गुमाएर २८९ रन बनाएर पहिलो इनिङ्स घोषणा गरेको थियो । दोस्रो टेस्ट जितसँगै वेस्ट इन्डिजले अस्ट्रेलियाविरुद्धको २ खेलको सिरिज १–१ को बराबरी गरेको छ । यसअघि भएको पहिलो टेस्टमा भने अस्ट्रेलिया १० विकेटले विजयी भएको थियो ।
यसअघि वेस्ट इन्डिजले आफ्नै देशको सेन्ट जोन्स स्टेडियममा भएको खेलमा २००३ मा ३ विकेटले जित निकालेको थियो । त्यसपछि टोलीले २० टेस्ट खेल्दा १६ खेलमा हार भोग्यो भने ४ टेस्ट बराबरी भएको थियो । अस्ट्रेलियामा भने वेस्ट इन्डिजले २६ वर्षपछि टेस्ट जितेको हो ।
पछिल्लो पटक पर्थको मैदानमा सन् १९९७ फेब्रुअरीमा टोलीले १० विकेटले जित हात पारेको थियो । त्यसयता इन्डिजले अस्ट्रेलियामा १७ टेस्ट खेल्दा १५ खेलमा हार भोगेको थियो भने २ खेल बराबरी भएको थियो । पिंक बल टेस्टमा अस्ट्रेलियाको यो पहिलो हार हो ।
नोभेम्बर २०१५ मा न्युजिल्याण्डलाई हराएयता टोलीले कुल ११ डे–नाइट टेस्ट खेलेको छ र ती सबै जितेको थियो । यसअघि सन् २०२२ को डिसेम्बरमा एडिलेडमा भएको डे–नाइट टेस्टमा अस्ट्रेलियाले वेस्ट इन्डिजलाई हराएको थियो ।
