१९ माघ, काठमाण्डौ ।
चिनियाँ ह्याकर ’भोल्ट टाइफुन’ ले अमेरिकी पूर्वाधारहरूलाई निशाना बनाएको अमेरिकी संघीय अनुसन्धान विभाग (एफबीआई)ले आरोप लगाएको छ । अमेरिकाको ऊर्जा र पाइपलाइनजस्ता प्रमुख पूर्वाधार परियोजनाहरूमा चिनियाँ राज्य समर्थित ह्याकर समूहहरूबाट पछिल्ला दिनमा भएको ह्याकिङ आक्रमणको प्रयासलाई आफूहरूले निस्तेज तुल्याएको पनि एफबीआईले दाबी गरेको छ ।
बुधबार अमेरिकी संसदको एक समितिमा सोधिएका प्रश्नहरूको जवाफ दिँदै एफबीआईका निर्देशक क्रिस्टोफर रेले आफूहरूले ’भोल्ट टाइफुन’ नामक चिनियाँ ह्याकर समूहलाई बन्द गराउन अभियान नै चलाएको बताएका थिए । रेले आफ्नो बयानका क्रममा सो समूहले अमेरिकास्थित विभिन्न पुराना सरकारी कार्यालयका राउटरहरूमार्फत ह्याकिङ र डेटा चोरीको प्रयास गरेको आरोप लगाएको बेलायती सञ्चार संस्था बीबीसीले उल्लेख गरेको छ ।
कुनै शत्रुतापूर्ण द्वन्द्व भइहालेको खण्डमा अमेरिकाका प्रमुख पूर्वाधारहरूलाई काम नलाग्ने बनाउन सकियोस् भन्ने उद्देश्यले चीनले आफ्नो प्राविधिक तयारी अगाडि बढाइरहेको एफबीआई प्रमुखको निष्कर्ष थियो । उनको यो आरोपमा चीनले कुनै आधिकारिक प्रतिक्रिया जनाइसकेको छैन । यद्यपी, विगतमा चीनले आफूमाथि लाग्ने गरेको राज्य समर्थित साइबर युद्धको प्रतिवाद गर्दै अमेरिकालाई नै ’संसारको सबैभन्दा ठूलो ह्याकर राज्य र विश्वव्यापी साइबर चोर’ भएको आरोप लगाउने गरेको थियो ।
भोल्ट टाइफुन समूहले अमेरिकी सञ्चार संयन्त्रमा आक्रमण गरेको यो पहिलो पटक होइन । यसअघि सन् २०२३ को मे महिनामा सोही समूहले गुआमस्थित अमेरिकी सेनाका बेसहरूमा ईमेल र अन्य सञ्चार पूर्वाधारमाथि मालवेयर मार्फत आक्रमण गरेको थियो । त्यस्तै, जुलाइमा अमेरिकी वाणिज्य मन्त्रालयसहित विभिन्न सरकारी निकायका ईमेलमा आक्रमण गरेको माइक्रोसफ्ट र अमेरिकी गुप्ताचर संस्थाहरूले घोषणा गरेका थिए।
अमेरिकी विदेशमन्त्रीको चीन भ्रमण आसपास पनि चिनियाँ राज्यसमर्थित ह्याकरहरूले अमेरिकी अधिकारीहरूका ईमेलमा अनाधिकृत पहुँच बनाएको सार्वजनिक भएको थियो । चीन सरकारले भने यस्तो आरोपहरूलाई एकदमै अव्यावसायिक र भ्रामक सूचना भएको प्रतिक्रिया दिँदै आएको छ ।
बुधबारको बयानका क्रममा एफबीआई निर्देशकले सो चिनियाँ ह्याकरहरूको समूह विभिन्न अमेरिकी पूर्वाधारका एक सयभन्दा बढी पुराना राउटरमा मालवेयर इन्स्टल गर्न सफल भएको उल्लेख गरेका थिए । ’चीनले युद्धको अवस्था आइहालेमा राजनीतिक वा सैन्य स्थानहरूमा मात्रै आक्रमणको तयारी गरेको छैन,’ रेको भनाइ थियो, ’आवश्यक परेमा उनीहरू अमेरिकी समूदाय र नागरिकहरूमा उथलपुथल मच्चाउन र साँच्चै क्षति पु¥याउन सक्ने तयारीमा छन् ।’
अमेरिकी संसदीय समितिको सो छलफलमा चीनको त्यस्तो तयारी साइबर पूर्वाधार क्षेत्रमा विभिन्न पावर ग्रीड र ठूला पुलहरूमा बम राखेजत्तिकै जोखिमपूर्ण भएको चर्चा भएको थियो । चीनले भने अमेरिकी संसद्को अमेरिका–चीन प्रतिस्पर्धासम्बन्धी समितिकै कडा शब्दमा आलोचना गर्ने गरेको छ ।
एफबीआई निर्देशकले भोल्ट टाइफुन समूहजस्ता अभियान चीन सरकारले साइबर युद्धका लागि तयार गरेको भन्दै यस्ता साधन स्रोतबारे विस्तृतमा बयान गरेका थिए ।रेले चीनको राज्यसमर्थित ह्याकिङ क्षमता बाँकी सबै देशहरूको जोड्दाभन्दा पनि ठूलो रहेको र एफबीआईका साइबर एजेन्टभन्दा चीनका यस्ता एजेन्टहरू ५० गुणा धेरै रहेको दाबी गरेका थिए ।
अमेरिका र चीनबीचको प्रविधि युद्ध बढ्दै जाँदा दुई देशले खुलेरै एकर्कालाई साइबर आक्रमणमा संलग्न भएको आरोप लगाउने गरेका छन् । संगठित रूपमा हुने ह्याकिङको क्षति सन् २०२० मा १० खर्ब डलरभन्दा माथि पुगेको अनुमान गरिएको थियो । सन् २०२४ मा आफ्नो साइबर सुरक्षा प्रणाली बलियो बनाउन विभिन्न संस्थाहरूको क्षमता विकासका लागि मात्रै अमेरिकी संघीय बजेटमा झन्डै १८ अर्ब डलर विनियोजन भएको एजेन्सीहरूले जनाएका छन् ।
