Nepal Times
Nepal Times
225
Shares

जनयुद्ध दिवस मनाउन प्रचण्डको अपिल

जनयुद्ध दिवस मनाउन प्रचण्डको अपिल

१ फागुन , विराटनगर ।

प्रधानमन्त्री पुष्पकमल दाहाल ‘प्रचण्ड’ले आज फागुन १ गते जनयुद्ध दिवसलाई राष्ट्रिय उत्सव र गौरवको दिनका रूपमा मनाउन अपिल गरेका छन् । माओवादी केन्द्रले मनाउँदै आएको जनयुद्ध दिवसको २९ औं वार्षिकोत्सवको अवसरमा शुभकामना सन्देश जारी गर्दै प्रधानमन्त्री प्रचण्डले जनयुद्ध माओवादीले नेतृत्व गरेको भएपनि पहिचान, अधिकार, मुक्ति, न्याय र स्वतन्त्रता चाहने सम्पूर्ण मुक्तिकामी एवं परिवर्तनप्रेमी नेपालीहरूको साझा दिवस रहेको बताएका छन् ।

‘तसर्थ, जनयुद्ध दिवसलाई विभिन्न रचनात्मक कार्यक्रमसहित राष्ट्रिय उत्सव र गौरवको दिनका रूपमा मनाउन म सम्पूर्ण जनसमुदायमा हार्दिक अपील गर्दछु,’ प्रधानमन्त्री प्रचण्डले जारी गरेको सन्देशमा उल्लेख छ । उनले जनयुद्धकै जगमा देशमा सामन्ती राजतन्त्रको अन्त्य भई संघीय लोकतान्त्रिक गणतन्त्रको स्थापना र समावेशी लोकतन्त्र संस्थागत भएको बताएका छन् ।

‘जनयुद्धको जगमा जनआन्दोलनको संयोजनबाट मधेसी, मुस्लिम, महिला, दलित, आदिवासी, जनजाति, थारू समुदाय लगायत उत्पीडित वर्ग, जाति, लिंग, क्षेत्र र समुदायमा उच्च राजनीतिक जागरणसहित उनीहरूको पहिचान र अधिकार स्थापित भएको छ।

सामाजिक न्यायको उन्नत व्यवस्थासहित समाजवादोन्मुख संविधानको निर्माण र कार्यान्वयन सम्भव भएको छ। यसर्थ, युग परिवर्तनको प्रतिनिधित्व गर्ने जनयुद्ध आफैमा ऐतिहासिक र गौरवशाली थियो भन्ने तथ्य प्रमाणित हुन्छ,’ सन्देशमा भनिएको छ । प्रधानमन्त्री प्रचण्डले जनयुद्धको जगमा स्थापित भएका अधिकार र उपलब्धि राष्ट्रका साझा सम्पत्ति रहेको समेत बताएका छन् ।

गत वर्षदेखि सरकारले जनयुद्ध दिवसका दिन सार्वजनिक विदा दिन सुरु गरेको थियो । सोही बमोजिम यस पटकको वार्षिक क्यालेण्डरमा समेत जनयुद्ध दिवसका लागि सार्वजनिक विदा जनाउने रातो अक्षरमा लेखिएकामा सर्वोच्च अदालतले उक्त दिनको बिदा बदर गरेपछि सार्वजनिक बिदा नभएको जानकारी मंगलबार मात्रै गृहमन्त्रालयले गराइसकेको छ ।

गृह मन्त्रालयले विज्ञप्ति जारी गर्दै यस्तो जानकारी गराएको हो । तर केही पालिका तथा वडाहरुमा भने संघ सरकार तथा सर्वोच्च अदालतको आदेशको उल्लंघन गर्दै सार्वजनिक विदा दिइएको छ । फागुन १ गते तत्कालीन नेकपा माओवादीले सशस्त्र विद्रोह थालनी गरेको दिन सम्झँदै रुकुम पूर्व र पश्चिमका ७ वटा स्थानीय तहले सार्वजनिक दिएका छन् ।

रुकुम पूर्वका पुथा उत्तरगंगा, भुमे र सिस्ने गाउँपालिका तथा पश्चिमका चौरजहारी र आठविसकोट नगरपालिका एवं सानीभेरी र त्रिवेणी गाउँपालिकाले सोमबार सार्वजनिक सूचना जारी गरेर बिदा दिएका हुन् । यी स्थानीय तहहरूले बिदा मात्रै नभएर आज विभिन्न कार्यक्रम समेत गरेर ’जनयुद्ध दिवस’ मनाउने जनाएका छन् ।

फागुन १ लाई जनयुद्ध दिवस’ का रुपमा मनाउन भन्दै माओवादी केन्द्रको नेतृत्वमा रहेका पालिकाहरूमा बिदा दिइएको हो । यस्तै कतिपय स्थानीय तहमा प्रमुख वा उपप्रमुख तथा अध्यक्ष वा उपाध्यक्ष नजितेका ठाउँमा पनि वडाले समेत आफुखुशी बिदा दिएका छन् ।

स्थानीय तहको प्रमुख वा उपप्रमुख तथा अध्यक्ष वा उपाध्यक्षमा अन्य दलबाट निर्वाचित भएका तर वडामा नेकपा (माओवादी केन्द्र)बाट निर्वाचित वडाध्यक्षले आफुखुशी आफ्नो वडामा मात्रै भए पनि उक्त दिन सार्वजनिक बिदा दिएका हुन् । गत वर्ष माओवादी केन्द्रका अध्यक्षसमेत रहेका प्रधानमन्त्री प्रचण्ड नेतृत्वको मन्त्री परिषदले निर्णय गरेर जनयुद्ध दिवसलाई राष्ट्रिय उत्सवका रुपमा मनाउने भन्दै सार्वजनिक विदा दिने निर्णय गरेको थियो ।

 

जसलाई लिएर राजनीतिक वृत्तसंग नागरिकस्तरमा व्यापक आलोचना भएको थियो । सर्वोच्चले पनि जनयुद्ध दिवसमा विदा नदिन सरकारको नाममा अन्तरिम आदेश दिएको छ । विभिन्न मितिमा परेका ६ वटा रिटमाथि सुनुवाई गरेको सर्वोच्चले संक्रमणलीन न्याय प्रभावित हुनसक्ने तथा द्वन्द्वपीडितहरुको भावना चोट पर्नसक्ने भन्दै जनयुद्ध दिवसमा बिदा दिने निर्णय खारेज गरेको हो । सर्वाेच्चले ‘बिदा दिने निर्णय संविधानको मूल भावनाविपरीत’ भएको समेत बताएको छ ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.