७ फागुन , काठमाण्डौ ।
आज ७४ औं राष्ट्रिय प्रजातन्त्र दिवस देशभर विभिन्न कार्यक्रम आयोजना गरी मनाइएको छ । तर राष्ट्रिय प्रजातन्त्र दिवसको अवसरमा मूल समारोह समितिले आयोजना गरेको कार्यक्रममा पत्रकारलाई प्रवेश दिइएन् ।सैनिक मञ्च टुँडिखेलमा आयोजित विशेष समारोहमा प्रवेश नदिइएपछि फोटो पत्रकारहरूले क्यामेरा डाउन गरेर विरोध जनाएका छन् ।
सूचना तथा प्रसारण विभागको कार्डलेसमेत प्रवेश नदिएपछि पत्रकारहरूले सांकेतिक विरोध गरेका हुन् । समारोहको निमन्त्रणापत्र भए मात्रै प्रवेश दिने भन्दै पत्रकारहरूलाई आयोजकले फर्काइदिएको छ । विक्रम संवत् २००७ फागुन ७ गते १०४ वर्षसम्म चलेको जहाँनिया राणाशासन अन्त्य भई नेपालमा प्रजातन्त्रको स्थापनाको घोषणा भएको दिनको स्मरणमा यो दिवस मनाउन थालिएको हो ।
तर प्रजातन्त्र दिवसको उपलक्ष्यमा काठमाडौंको सैनिक मञ्च टुँडिखेलमा विशेष कार्यक्रम आयोजना गरिएको भएपनि जनताका आवाज बन्ने पत्रकारहरुलाई नै प्रवेश दिइएन । फागुन ६, ७ र ८ गते प्रजातन्त्र दिवस भव्यताका साथ मनाउन प्रधानमन्त्री पुष्पकमल दाहाल ‘प्रचण्ड’को अध्यक्षतामा प्रजातन्त्र दिवस मुल समारोह समिति गठन भएको थियो ।
जनताको जित भएको दिन । नेपालको इतिहासमा अविस्मरणीय दिन ।यही दिनको जगबाट नै आज नेपाली संघीय गणतन्त्र नेपालका नागरिक बनेका छन् । तर तिनै नागरिकलाई सुसूचित गर्ने पत्रकारहरु प्रजातन्त्र दिवस समारोहको समाचार संप्रेषण गर्नबाट बन्चित भएका छन् । यसैले सूचना तथा प्रसारण विभागको कार्डलेसमेत प्रवेश नदिएपछि पत्रकारहरूले सडकमै क्यामेरा राखेर सांकेतिक विरोध गरेका छन् ।
