२८ फागुन , काठमाण्डौ ।
राष्ट्रियसभा अध्यक्षको निर्वाचनअन्तर्गत आज उम्मेदवारी दर्ता हुँदैछ । यसका लागि अहिले ११ बजेबाट दिउँसो १ बजेसम्मका लागि तोकिएको छ । संघीय संसद सचिवालयकाअनुसार आजै दिउँसो उम्मेदवारको नामावली प्रकाशन हुनेछ । राष्ट्रिय सभाको अध्यक्षका लागि सत्ता गठबन्धनबाट नेकपा (माओवादी केन्द्र) का नारायण दाहाल र नेपाली कांग्रेसबाट युवराज शर्मालाई उम्मेदवार बनाउने निर्णय भइसकेको छ ।
मंगलबार ११ बजे बस्ने बैठकले राष्ट्रियसभा अध्यक्षको चयन गर्नेछ । राष्ट्रियसभाका निवर्तमान गणेशप्रसाद तिमिल्सिना ६ वर्षे कार्यकाल सकेर बिदा भएपछि यो पद खाली छ । उनको स्थानमा आउन लागेका उमेद्वारमध्येका एक नारायण दाहाल पार्टीका स्थायी कमिटी सदस्य हुन् । उनी प्रधानमन्त्री पुष्पकमल दाहाल ’प्रचण्ड’का भाइ नाता पर्ने व्यक्ति हुन् ।
दाहाल ०७८ फागुन २५ गते राष्ट्रियसभामा मनोनीत भएका थिए । उनको कार्यकाल अब चार वर्ष बाँकी छ । सत्ता गठबन्धनको सहमति अनुसार अध्यक्षमा माओवादी र उपाध्यक्षमा एमालेले पाउने उल्लेख छ । सोही अनुसार माओवादीले अध्यक्ष उमेदवार टुंग्याएको हो ।
यसअघि भने प्रचण्डले नारायण दाहाललाई राष्ट्रिय सभा सदस्यकारुपमा मनोनयन गर्दा एमाले अध्यक्ष केपी शर्मा ओलीले चर्को आलोचना गरेका थिए । तर अब भने तिनै व्यक्तिलाई एमालेसमेतले अध्यक्षका रुपमा मत दिनु पर्नेछ । सत्ता गठबन्धनको प्रष्ट बहुमत भएकाले दाहालको जित पक्का जस्तै छ ।
यद्यपी यसअघि भने माओवादीमा हालकी उपाध्यक्ष उर्मिला अर्याल वा भर्खरै चुनाव जितेर आएकामध्ये झक्कु सुवेदी, रेणु चन्दको नाम पनि छलफलमा आएको थियो । किनभने लामो कार्यकाल भएकालाई राष्ट्रिय अध्यक्ष बनाउँदा संवैधानिक परिषद्मा पनि लामै समय प्रतिनिधित्व रहने माओवादी नेताहरुको तर्क थियो ।
तर प्रचण्डकै चाहना अनुसार दाहाललाई उम्मेदवार बनाउने निर्णय भएपछि पार्टीपंक्तिमा असन्तुष्टि देखिएको छ । यसअघि नै गत साउनमा सम्पन्न पार्टीको केन्द्रीय समिति बैठकमै केन्द्रीय सदस्यहरूले प्रचण्डलाई लक्षित गरी ‘सामन्तवादको किल्ला बालुवाटारमा सरेको’ भनेर सार्वजनिक रुपमा आलोचना गरेका थिए ।
तर प्रचण्डले एकपछि अर्को अवसर परिवारमा केन्द्रित गरिरहेका छन् । छोरीहरु, रेणु दाहाल दोस्रो कार्यकालका लागि भरतपुरकी मेयर छिन् । गंगा दाहाल प्रधानमन्त्रीकी स्वकीय सचिव हुन् । खानेपानी मन्त्री भइसकेको बुहारी बिना मगरलाई सुदूरपश्चिम प्रदेशको सहइन्चार्ज बनाएको छ भने कान्छा ज्वाइँ जीवन आचार्यलाई कोशी प्रदेशको मन्त्री दुई पटक मन्त्री भइसकेका छन् ।
