११ चैत , विराटनगर ।
इस्लामिक स्टेट अफ इराक एण्ड सीरिया–खुरासान (आईएसआईएस–के वा आईएसके) त्यो संगठन हो, जसले रुसमा भएको पछिल्लो आतंकबादी हमलाको जिम्मा लिएको छ । जुन रुसको राजधानी मस्कोको एक कन्सर्ट हलमा भएको थियो । अमेरिकाले पनि आफ्नो गुप्तचर नेटवर्कको हवाला दिदै सो हमला आईएसकेले नै गराएको बताएको छ ।
इस्लामिक स्टेटको न्यूज एजेंसी अमाकले पनि टेलीग्राममा यो हमलाको जिम्मेवारी लिदै भनेको छ, कि यो पुटिनको इस्लाम विरोधी कर्महरुको नतिजा हो । इरान, सिरिया र टर्किए जस्ता मुस्लिम देशहरुको नजिकको सहयोगी मानिएको रुसमा यस्तो आतंकबादी हमला हुनु आश्चार्यजनक नै हो । किनभने धेरैजसो इस्लामी आतंकवादी संगठनहरुका लागि अमेरिका सबैभन्दा ठूलो शत्रु हो ।
यो मामिलामा जानकारहरुले के विश्लेषण गरिरहेका छन् भने यो आईएसले मस्कोमा गरेको हमला झण्डै एक दशक पहिले भएको रुसी एक्शनको रिएक्शन हो । सन २०१२, १३ मा जब आईएसआईएसले इराक र सिरियामा विस्तार गरिरहेको थियो । तब रूसी राष्ट्रपतिको एक फैसलाले आईएसआईएसको ढाड भाँचिएको थियो । पुटिनले २०१५ मा सिरियाका राष्ट्रपति बशर–अल–अशदको साथ दिने निर्णय गरेपछि त्यसको मार यो संगठनमा परेको थियो ।
सुरक्षा परामर्श फर्म सौफान ग्रुपका अनुसार आईएसकेले कयौं वर्षदेखि अमेरिका र रूसमा हमला गर्ने योजना बुनिरहेको छ । आतंकवादी समूहले पुटिनलाई मुस्लिम विरोधी मान्दछन् । पुटिनले बशर–अल–असदको साथ दिएपछि आईएसले एकातिर अमेरिका र अर्कातिर रूसी हमलाको सामना गर्नु परेको थियो । र केही दिनमा नै यो संगठन मासिएको थियो ।
अहिले त्यसैको बदला लिएको एकथरी विश्लेषकहरु बताउँछन् । तर यो हमला हुनसक्ने भन्दै अमेरिकाले रुसलाई पहिला नै सूचना दिइसकेको बताएको छ । यो आक्रमणका घटना करिब दुई साताअघि अमेरिकी गुप्तचरले दिएको चेतावनीसँग मिल्न गएको छ । मार्च ७ मा मस्कोस्थित अमेरिकी दूतावासले एक अलर्ट जारी गर्दै लेखेको थियो “अतिवादीहरूले मस्कोमा कन्सर्टलगायत ठूला जमघटलाई लक्षित गर्ने योजना बनाएको रिपोर्ट छ ।
अमेरिकी नागरिकहरूलाई ठूला जमघट नगर्न सल्लाह दिइन्छ ।” तर, उक्त चेतावनी ४८ घण्टाका लागि मात्रै थियो । रूसी अधिकारीहरूले अमेरिकी खुफिया जानकारी अस्पष्ट रहेको गुनासो गरेका छन् । तर सूचनाको बावजुद पनि रुसले वेवास्था गर्दा यो घटना घटेको भन्दै आलोचना भइरहेको छ ।
यसबीच रूसी राष्ट्रपति भ्लादिमिर पुटिनले शनिबार दिउँसो जनतालाई सम्बोधन गर्दै हत्याराहरूलाई दोस्रो विश्वयुद्धका नाजीहरूसँग तुलना गरेका छन् । उनले रूसी एकतालाई कसैले कमजोर पार्न नसक्ने बताएका छन् । घटनाको पछाडि को हो भन्ने पत्ता लगाएर सजाय दिने चेतावनी उनले दिएका छन् । यद्यपी यसमा संलग्न रहेको भन्दै ११ जनालाई पक्राउ पनि गरिसकिएको छ ।
आक्रमणमा परी ज्यान गुमाएकाहरूको शोकमा रूसमा आज आइतबार राष्ट्रिय शोक मनाइएको छ । पुटिनले यो घटनामा संलग्नहरु युक्रेनतर्फ भाग्दै गरेको अवस्थामा समातिएको बताएर शंकाको सुई युक्रेनतर्फ पनि मोड्न खोजेका छन् । तर जेलेन्स्कीले यो घटनामा आफ्नो हात नभएको बरु रुसले आफै सो घटना घटाएको दाबी गरेका छन् । यसबीच रुसले फेरि एकपटक युक्रेनको राजधानी किभमा आक्रमण गरेको छ ।
रुसी सेनाले किभमा हवाई आक्रमण गरेको हो । आक्रमणपछि युक्रेनले पूरै देशभरि ‘अलर्ट’ जारी गरेको छ ।रुसी हवाई आक्रमणपछि किभमा बस्ने युक्रेनका नागरिक शरण लिन मेट्रो स्टेसनतर्फ भागदौड गरेको जनाइएको छ । युक्रेनको छिमेकी देश पोल्यान्डले पनि आफ्नो वायुसेनालाई सक्रिय बनाएको छ । पोल्यान्डले आफ्नो सीमा जोडिएको युक्रेनको सहर लवीवमा रुसले हवाई आक्रमण गरेपछि वायुसेनालाई अलर्टमा राखेको हो ।
रुसले किभमाथि आइतबार बिहान ५ बजेदेखि आक्रमण थालेको थियो । रुसी आक्रमणको जवाफ दिइएको युक्रेनको सेनाले जनाएको छ । शुक्रबार पनि रुसले युक्रेनमाथि मिसाइल आक्रमण गरेको थियो । आक्रमणबाट एउटा बाँध ध्वस्त भएको जनाइएको छ । बाँधमा क्षति भएपछि विद्युत् उत्पादन केन्द्र बन्द भएको छ ।
मस्कोमा भएको हमलामा आईएसकेले जिम्मेवारी लिदापनि पुटिनले यसका पछाडी युक्रेनको हात देख्नु र लगत्तै किभमा आक्रमण तिव्र पार्नु, अमेरिकाले एक साता अगाडी नै यस्तो खालको हमला हुनसक्ने सूचना दिदा पनि रुसले वेवास्था गर्नुलाई तपाईले कसरी हेर्नु भएको छ, आफ्ना टिप्पणीहरु अवस्य व्यक्त गर्नुहोला ।
ताजा खबरका लागि नेपाल टाइम्स्को अनलाइन पोर्टल डब्लु डब्लु डब्लु डट नेपाल टाइम्स् डट नेटमा गएर हेर्न सक्नु हुनेछ । यसैगरि हाम्रो युट्युव च्यानल र फेसबुक पेज पनि अवस्य भिजिट गर्नुहोला । तपाईले गर्नु भएको लाइक, कमेन्ट, सेयर र सब्क्राइबका लागि धेरै धन्यवाद । नेपाल टाइम्स् हेर्दै गर्नुहोला नमस्कार ।
