१२ चैत , एजेन्सी ।
इन्डियन प्रिमियर लिगको पाच पटकको च्याम्पियन मुम्बई इन्डियन्स यो सिजनको पाँचौँ खेलमा गुजरात टाइटन्ससँग स्तब्ध बनेको छ । आइतबार राति भएको खेलमा मुम्बई गुजरातसँग ६ रनले पराजित भएको हो । गुजरातले प्रस्तुत गरेको १ सय ६९ रनको लक्ष्य पछ्याउने क्रममा मुम्बईले निर्धारित २० ओभरमा ९ विकेटको क्षतिमा १ सय ६२ रन मात्र बनाउन सक्यो ।
डेवाल्ड ब्रेभिसले ३८ बलमा ४६ रन तथा पूर्वकप्तान रोहित शर्माले २९ बलमा ४३ रन बनाए पनि टोलीलाई जिताउन सकेनन् । गुजरातका लागि अजमतुल्लाह ओमरजाई, उमेश यादव, स्पेन्सर जोन्सन र मोहित शर्माले २–२ विकेट लिए । साई किशोरले एक विकेट हात पारे । मुम्बईका लागि तिलक वर्माले २५ र नमन धिरले २० रनको योगदान दिए ।
यसअघि टस हारेर पहिले ब्याटिङ गरेको गुजरातले निर्धारित २० ओभरमा ६ विकेटको क्षतिमा १ सय ६८ रन बनाएको थियो । गुजरातका लागि प्लेयर अफ द म्याच घोषित साई सुदर्शनले ३९ बलमा ४५ रन बनाए । उनले यस क्रममा ३ चौका र १ छक्का हिर्काए । कप्तान शुभमन गिलले ३१ तथा राहुल तेवाटियाले २२ रन बनाए ।
मुम्बईका लागि जसप्रित बुमराहले ३ तथा जेराल्ड कोट्जीले २ विकेट लिए । इन्डियन प्रिमियर लिग क्रिकेट (आईपीएल) को १७औँ संस्करणमा आज रोयल च्यालेन्जर्स बैंग्लुरुले पञ्जाब किङ्सको सामना गर्दैछ । खेल बैंग्लुरुस्थित एम. चिन्नास्वामी स्टेडियममा नेपाली समय अनुसार, राति ७ः४५ बजे सुरु हुनेछ । जारी आईपीएलमा बैंग्लुरु र पञ्जाब दुबैले आफ्नो दोस्रो खेल खेल्न लागेका हुन् ।
चेन्नईमा खेलिएको प्रतियोगिताको उद्घाटन खेलमा चेन्नई सुपर किङ्सले बैंग्लुरुलाई ६ विकेटले हराएको थियो । पञ्जाब भने आफ्नो पहिलो खेलमा विजयी भएको थियो । पञ्जाबले आफ्नो पहिलो खेलमा दिल्ली क्यापिटल्सलाई चार विकेटले हराएको थियो । एम. चिन्नास्वामी स्टेडियममा पाँच वर्षपछि बैंग्लुरु र पञ्जाब आपसमा भिड्न लागेका हुन् ।
यसअघि यो स्टेडियममा सन् २०१९ मा बैंग्लुरु र पञ्जाबबिच खेल भएको थियो । त्यतिबेला बैंग्लुरु १७ रनले विजयी भएको थियो । इन्डियन प्रिमियर लिगमा हालसम्म बैंग्लुरु र पञ्जाबबिच ३१ खेल भएको छ । त्यसमध्ये १४ खेलमा बैंग्लुरु विजयी भएको छ । १७ खेलमा भने पञ्जाबले सफलता हात पारेको छ ।
एम. चिन्नास्वामी स्टेडियममा भने हालसम्म यी दुई टोलीबिच ११ खेल खेलिएको छ । त्यसमध्ये ६ खेलमा बैंग्लुरु र पाँच खेलमा पञ्जाब विजयी भएका छन् । घरेलु मैदानमा बैंग्लुरुको नतिजा केही उत्कृष्ट देखिन्छ ।
