Nepal Times
Nepal Times
927
Shares

केजरीवालले गर्दा अमेरिकासंग भारतको ट्युनिंग बिग्रियो

केजरीवालले गर्दा अमेरिकासंग भारतको ट्युनिंग बिग्रियो

१५ चैत, विराटनगर ।
दिल्लीका मुख्यमन्त्री अरविंद केजरीवाललाई पक्राउ गरिएको विषयले यतिबेला विश्वनेताहरुकै ध्यान खिचेको छ । केजरीवालको गिरफ्तारीको मुद्या अन्तर्राष्ट्रिय बन्दै गएको छ । जुन प्रकारले अरविंद केजरीवाल अहिले इडीको हिरासतमा छन्, यसमा उनको पक्षबाट, उनले पाउनु पर्ने कानूनी उपचार वा प्रक्रियाहरु निस्पक्ष हुनुपर्छ भन्दै शक्तिराष्ट्रहरुले नै भारत सरकारको ध्यानआकार्षण गराएका छन्।

पहिला जर्मनी र अहिले अमेरिकाजस्ता देशहरुले केजरीवालको गिरफ्तारीमा टिप्पणी गरेका छन् । यसले मोदी सरकारको भने टाउको दुखाईदिएको छ । भारतको विदेश मन्त्रालयले जर्मनी र अमेरिकाको टिप्पणी र चासोप्रति कडा आपत्ति नै जनाएको छ ।

भारतले दुवै देशका कूटनीतिकहरुलाई बोलाएर आफ्नो आपत्ति रहेको जनाएको छ । र केजरीवाल पक्राउ परेको विषय आफ्नो घरेलु मामिला भएको बताएको छ । यता अमेरिकाले भने आफ्ना दूतावासका अधिकारीलाई भारतले बोलाएर केरकार गरेकोमा प्रतिक्रिया दिएको छ ।

भारतीय विदेश मन्त्रालयको आपत्तिप्रति बुधबार अमेरिकाले भन्यो कि उ निष्पक्ष, पारदर्शी र समयमा कानूनी प्रक्रियाहरु टुंगिने कुराको समर्थन गर्दछ र उसलाई लाग्दैन कि यसमा कसैलाई पनि आपत्ति हुन्छ ।

अमेरिकी विदेश मंत्रालयका प्रवक्ता म्याथ्यू मिलरले भने, “हामी दिल्लीका मुख्यमंत्री अरविंद केजरीवालको गिरफ्तारी सहित यी कारबाहीहरुमाथि मिहिन ढंगले ख्याल गरिरहेका छौं“ ।

म्याथ्यू मिलरलाई विदेश मंत्रालयको प्रेस कन्फ्रेन्सका क्रममा अरविंद केजरीवालमाथि अमेरिकी टिप्पणीको बारेमा भारत रहेका कार्यवाहक डिप्टी चीफ अफ मिशन ग्लोरिया बारबेनालाई बोलाइएको र कांग्रेस पार्टीको बैंक खाताहरु फ्रीज गरिएको बारेमा सोधिएको थियो।

जवाफमा उनले भने, “हामी कांग्रेस पार्टीमाथि लागेको आरोपका बारेमा पनि अवगत छौं । आयकर विभागले काँग्रेसको केही बैंक खाताहरु फ्रिज गरेको छ, जसका कारण आगामी चुनावमा प्रचारप्रसारका लागि काँग्रेसलाई चुनौतीपूर्ण भएको छ ।

हामी यी सबै मुद्याहरुमा निष्पक्ष, पारदर्शी र समयमै कानूनी प्रक्रियाहरु होउन भन्नका लागि प्रोत्साहित गर्छौ“ ।यसअघि भारतीय विदेश मंत्रालयले भने बुधवार भनेको थियो, “हामी भारतमा केही कानूनी प्रक्रियाहरुमाथि अमेरिकी विदेश विभागका प्रवक्ताको टिप्पणीप्रति कडा आलोचना गर्दछौं ।

कूटनीतिमा कुनै देशबाट अर्को देशको संप्रभुता र आंतरिक मामिलामा सम्मान गरिने अपेक्षा गरिन्छ । एक लोकतांत्रिक देशसंग यो अपेक्षा अझ धेरै हुन्छ । भारतको कानूनी प्रक्रियाहरु एक स्वतंत्र न्यायपालिकामा आधारित छ । जुन उद्देश्यपूर्ण र समयमा निर्णय सुनाउनका लागि प्रतिबद्ध छ ।

त्यसमा प्रश्न उठाइनु अनुचित छ“, भारतको विदेश मन्त्रालयले भनेको छ । यता जर्मनी भने आफ्नो पहिलेको टिप्पणीलाई लिएर पछिल्लो पटक केही नरम भएको छ । बुधवार जर्मनीका विदेश मंत्रालयका प्रवक्तासंग पनि संचारमाध्यमहरुले उसको टिप्पणीका बारेमा सोधेका थिए ।

तर उनले सोबारे टिप्पणी गर्न अस्वीकार गरे । उनले भने, ’’हामीले यसमा प्रतिक्रिया दिइसकेका छौं । दुई देशबीच भएको निजी छलफलको ब्योहोरा हामी दिन सक्दैनौ । हामी दुवै देशबीच सहयोग र राम्रो सम्बन्ध हाम्रो हितमा छ ।

दुवै देश सरकारको स्तरमा आगामी वार्ताका लागि तयारी गरिरहेका छन्, जुन यसैवर्ष हुनेछ । उनले अगाडी भने, भारतको संविधानले मौलिक अधिकार र स्वतंत्रताको सुनिश्चितता गरेको छ र एक रणनीतिक साझेदारका रुपमा भारतको साथमा हामी यी मूल्यहरु मान्दछौं’’ ।

तर यसअघिको टिप्पणीमा भने जर्मनीले पनि दिल्लीका मुख्यमंत्रीका लागि निष्पक्ष सुनुवाइको अपील गरेको थियो । त्यसपछि भारतले जर्मन दूतावासका उप प्रमुख जर्ज एन्जभीलरलाई बोलाएर आफ्नो असन्तुष्टि जाहेर गरेको थियो ।

जर्मनीलाई भारतीय विदेश मंत्रालयले बयान जारी गरेर भनेको थियो, “हामी यस्ता टिप्पणीलाई हाम्रो न्यायिक प्रक्रियामा दखल र हाम्रो न्यायपालिकाको स्वतंत्रतालाई कमजोर पार्ने रुपमा हेर्छौ“ ।

भारतको यो प्रतिक्रियापछि जर्मनी केही नरम बनेको छ । बुधबार जर्मनीको विदेश मंत्रालयका प्रवक्ताले भने, कि जर्मनी भारतको साथ र आपसी सहयोगमा गहिरो रुचि राख्दछ । साथै आपसी विश्वासपूर्ण माहौलमा मिलेर काम गर्न इच्छुक छ ।

मुख्यमन्त्री केजरीवाललाई नयाँ दिल्लीस्थित उनको आवासबाट गत विहीबार ईडीले पक्राउ गरेको थियो । उनीमाथि दिल्ली मदिरा नीतिमा भएको कथित घोटालामा सहभागि भएको आरोप लगाइएको छ ।

प्रवर्तन निर्देशालय (ईÞडी)ले शुक्रवार भनेको थियो, कि दिल्लीका मुख्यमंत्री अरविंद केजरीवाल ’मदिरा घोटाला मामिलामा मुख्य ’षड्यंत्रकर्ता’ हुन् । समाचार एजेंसी पीटीआईका अनुसार, उनलाई आबकारी नीतिसंग जोडिएको मनी लन्ड्रिगको मामिलामा पक्राउ गरिएको हो ।

यसअघि अरविंद केजरीवाललाई ईडीले सात पटक नोटिस पठाएको थियो, तर उनी उपस्थित भएका थिएनन् । यसबीच केजरीवाललाई दिल्ली उच्च अदालतले राहत दिन अस्वीकार गरेको छ । बुधबार उच्च अदालतले प्रवर्तन निर्देशनालयलाई अप्रिल २ सम्मको समय दिएको भारतीय मिडियाहरुले उल्लेख गरेका छन् ।

अब यस मुद्दाको अर्को सुनुवाई अप्रिल ३ मा हुनेछ । अदालतले अप्रिल ३ को लागि केजरीवालको मुख्य याचिका पनि सूचीबद्ध गरेको बताइएको छ । मदिरा घोटालाको विषयमा इडी हुँदै अदालतमा पुगेपछि अब यसको फैसला कानूनी रुपमा नै हुनेछ ।

तर केजरीवाललाई लोकसभा निर्वाचनको मुखमा पक्राउ गर्नुलाई भने सबै विपक्षी दलहरुको शंकाको नजरले हेरिरहेका छन् । फेरि केजरीवालका विपक्षमा सरकारी साक्षी बनेका ब्यक्ति नै भारतीय जनता पार्टीका प्रमुख चन्दा दाता भएको खुलेपछि मदिरा घोटाला प्रकरणको अनुशन्धानमा आमआदमी पार्टीसहित विपक्षी दलहरुले शंका गरिरहेका छन् ।

केजरीवाल प्रधानमन्त्री नरेन्द्र मोदीका प्रमुख आलोचक हुन् भने विपक्षी गठबन्धनका प्रभावशाली नेता हुन् ।दिल्लीमा भएको कथित मदिरा घोटालामा दिल्लीका पूर्व उप–मुख्यमंत्री मनीष सिसोदिया र आम आदमी पार्टीका सांसद संजय सिंहसहित कयौं मानिसहरुलाई यसअघि नै पक्राउ गरिएको छ ।

यो प्रकरणमा दिल्लीका मुख्यमन्त्रीलाई पक्राउ गरिएको विषयमा जर्मनी, अमेरिकासहितले गरेका टिप्पणी अनि भारतले तत्कालै जनाएको प्रतिक्रियाबारे तपाईँका टिप्पणी पनि अवस्य व्यक्त गर्नुहोला । ताजा खबरका लागि नेपाल टाइम्स्को अनलाइन पोर्टल डब्लु डब्लु डब्लु डट नेपाल टाइम्स् डट नेटमा गएर हेर्न सक्नु हुनेछ । यसैगरि हाम्रो युट्युव च्यानल र फेसबुक पेज पनि अवस्य भिजिट गर्नुहोला । तपाईले गर्नु भएको लाइक, कमेन्ट, सेयर र सब्क्राइबका लागि धेरै धन्यवाद । नेपाल टाइम्स् हेर्दै गर्नुहोला नमस्कार ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.