४ वैशाख ,एजेन्सी ।
विश्व चर्चित स्टार फुटबलर तथा साउदी क्लब अल नासार स्टार खेलाडी क्रिस्टियानो रोनाल्डोलाई दुई खेलमा प्रतिबन्ध लागेको छ । साउदी सुपर कपको सेमिफाइनलमा अल हिलालविरुद्ध रातो कार्ड पाएका रोनाल्डोलाई साउदी फुटबल फेडेरेसनको अनुशासन समितिले दुई खेलको प्रतिबन्ध लगाएको हो ।
रातो कार्ड पाएपछि उनले खेलको रेफ्रीलाई मुक्का ताकेको, अल हिलालका खेलाडीलाई धक्का दिएपछि उनलाई दुई खेलको प्रतिबन्ध लगाइएको हो । मोहम्मद बिन जायद स्टेडियममा गएको सोमबार राति सम्पन्न सेमिफाइनलमा १० खेलाडीमा सिमित नासारलाई २–१ गोल अन्तरले पराजित गर्दै हिलाल उपाधिनजिक पुगेको थियो ।
खेलको ८६औँ मिनेटमा नासारका कप्तान क्रिस्टियानो रोनाल्डो रातो कार्ड पाउँदै मैदानबाट बाहिरिएका थिए । हिलालका खेलाडीलाई मुखमा कुहिनाले प्रहार गरेपछि उनलाई रेफ्रीले सिधै रातो कार्ड देखाएका थिए। अल–नासरको हारको क्रममा रातो कार्ड देखाइएपछि रोनाल्डोले रेफ्रीलाई आफ्नो मुट्ठी उचालेको देखिएको थियो ।
रोनाल्डोले अल–हिलालको अल–बुलाहीलाई कुहिनोले प्रहार गरेपछि सिधा रातो कार्ड देखाइएको थियो, जसले गर्दा उनी खेलको अन्तिम चरणमा मैदानबाट बाहिरिएका थिए । टक्करको कारण अराजकता भयो र रेफ्री मोहम्मद अल होइशले रोनाल्डोलाई रातो कार्ड देखाए, त्यसपछि रोनाल्डोले आफ्नो मुट्ठी उठाएका छन् । यो भिडिओ सामाजिक संजालमा तीव्र भाइरल भएको थियो ।
विश्वभरका करोडौ फ्यानका एक आइडल बनेका रोनाल्डोको मैदानमा देखिएको यो हर्कतको भने आलोचना भएको थियो । धेरै प्रशंसकहरुले उनमा दम्भ बढेको टिप्पणी गरेका थिए । दुई खेलको प्रतिबन्धपछि रोनाल्डोले अप्रिल १९ मा अल फेइहा र अप्रिल २७ को अल खालेजविरुद्धको महत्त्वपूर्ण खेल गुमाउने भएका छन् । यो सिजन अल नासार साउदी प्रो लिगमा पहिलो स्थानको अल हिलाल भन्दा १२ अंकले पछि रहेको छ ।
