५ वैशाख , काठमाण्डौ।
ओमानमा जारी एसिसी प्रीमियर लिगमा कतारविरुद्ध एकै ओभरमा ६ छक्का प्रहार गरेर विश्व क्रिकेटको ध्यान खिचेका नेपालका अलराउन्डर दीपेन्द्रसिंह ऐरीले आईसीसी टी–२० वरियतामा निक्कै ठूलो छलाङ मारेका छन् । आईसीसीको टी–२० वरियताको पछिल्लो सूची अनुशार उनी अलराउन्डरतर्फ ११औँ स्थानमा उक्लिएका छन् ।
यसअघि उनी २५ औँ स्थानमा थिए । समग्रमा टी–२० ब्याटिङतर्फ १६ स्थान सुधार गर्दै दीपेन्द्र ६२ औं स्थानमा उक्लिएका छन्। जारी एसिसी प्रीमियर लिगमा कतारविरुद्ध एकै ओभरमा ६ छक्का प्रहार गरेपछि ऐरीले आइसीसीको वरीयता सूचीमा एकै पटक ठूलो छलाङ मारेका हुन् ।
ब्याट्सम्यानको वरियतामा नेपालका आसिफ शेख ३६ स्थान माथि उक्लिएर ७५ औँ नम्बरमा पुगेका छन्। कुशल मल्ल ९ स्थान उक्लिएर एक सयौँ नम्बरमा छन्। बलिङतर्फ भने नेपालका कुनैपनि खेलाडी शीर्ष १ सय भित्र हटाउन सकेका छैनन। अलराउण्डरको शीर्ष स्थानमा बंगलादेशमा साकिब अल हसन रहेका छन् भने भारतीय खेलाडीमा हार्दिक पाण्डेय सबैभन्दा माथि ७ औं स्थानमा छन् ।
यसैगरी बलिङ तर्फ इङल्याण्डका आदिल रसिद शीर्षस्थानमा छन् भने श्रीलंकाका वानिन्दु हसराङ्गा दोस्रो स्थानमा छन् । यहाँ भारतका अक्षर पटेल चौथो स्थानमा छन् । टी २० ब्याटिङ तर्फ भारतका सूर्यकुमार शीर्षस्थानमा छन् भने शीर्ष १० भित्र भारतका यशस्वी जैसवाल मात्रै हटाएका छन् । टी २० ब्याटिङको दोस्रो स्थानमा इङल्याण्डका फिल साल्ट रहेका छन् ।
