२० वैशाख , एजेन्सी ।
युनाइटेड अरब इमिरेट्रसमा आज बिहानैदेखि फेरि भारी वर्षा भएको छ । अबुधावी र दुवई क्षेत्र वर्षाबाट बढी प्रभावित भएको जनाइएको छ । दुवईका बासिन्दा बिहान उठ्दा हुरीबतास, आकाशमा गडगडाहट र चट्यांङ्गको अवस्था रहेको थियो । मौसम प्रक्षेपणभन्दा अघि नै बिहान ३ बजे नै यो अवस्था आएको थियो ।
खाडी मुलुक यूएई र ओमानमा केही हप्ताअघि मात्रै वर्षा र बाढीले ठूलो जनधनको क्षति गराएको थियो । व्यापारहरु पनि त्यसबेला ठप्प भएको थियो । यातायातका सबै सवारी ठप्प भएका थिए भने विमानस्थलसमेत जलमग्न भएको थियो । अहिले पनि त्यस्तै परिस्थिति आउन सक्ने भन्दै सतर्कता अपनाउन भनिएको छ ।
सकेसम्म वर्क फ्रम होम र मिलेसम्म कक्षाहरु पनि अनलाइनबाट संचालन गर्न भनिएको छ । मेट्रो र र्सावजनिक यातायातहरुलाई पनि अलर्टमा रहन भनिएको छ । दुबईका विमानस्थलहरुले पनि ट्राभल एड्भाइजरी जारी गरेका छन् । ठूलो वर्षा सुरुमा राजधानी अबुधावीबाट सुदूर पश्चिममा रहेका अल धाफ्रा र अल शिला क्षेत्रमा महसुस गरिएको थियो ।
विमानस्थल क्षेत्रमा पनि भीषण वर्षा भएको जनाइएको छ । अत्यावश्यकबाहेक ड्राइभिङ्ग नगर्न र अत्यावश्यक परेमा होसियारी अपनाउन सरकारी निकायले सर्वसाधारणलाई अलर्ट जारी गरेको गल्फ न्युजले जनाएको छ । बुधबार रातिदेखि जारी वर्षा बिहीबारसम्म युएईका धेरै क्षेत्रमा हुनेछ।
वर्षासँगै केही स्थानमा मेघ गर्जन र चट्याङसहित पानी पर्ने सम्भावना रहेको छ । शुक्रबार र शनिबार बादल सफा हुने र हल्कादेखि मध्यम वर्षा जारी रहनेछ। दक्षिणी र पूर्वी भूभागमा भारी वर्षाको सम्भावना छ। वर्षाको पूर्वानुमानबारे यूएईको गृह मन्त्रालयले मन्त्रालयका सचिवको अध्यक्षतामा आन्तरिक सुरक्षासम्बन्धी सर्वोच्च समितिले काम गरिरहेको जनाएको छ ।
टोलीले मौसमको अवस्थाहरूमा हुने घटनाक्रम र अद्यावधिकहरूको निरन्तर अनुगमन गरिरहेको छ ताकि कुनै पनि घटनाको सामना गर्न सकियोस् । वर्षाले प्रभावित क्षेत्रमा आवश्यक सबै उपाय अपनाएको मन्त्रालयले जनाएको छ ।
