९ जेठ ,एजेन्सी।
कोलकाता नाइट राइडर्स इन्डिन प्रिमियर लिग (आईपीएल) को फाइनलमा प्रवेश गरेको छ । मंगलबार राति पहिलो क्वालिफायरमा सनराइजर्स हैदराबादलाई ८ विकेटले हराउँदै कोलकाता उपाधि नजिक पुगेको हो । यद्यपि पराजित हैदराबादसामु फाइनल पुग्ने थप एक अवसर बाँकी नै छ । आज पहिलो इलिमिनेटरमा राजस्थान रोयल्स र रोयल च्यालेन्जर्स बेंगलुरु भिड्ने छन् ।
त्यसको विजेताले शुक्रबार हुने दोस्रो क्वालिफायरमा हैदराबादको सामना गर्नेछ । हैदराबादले प्रस्तुत गरेको १ सय ६० रनको मध्यम लक्ष्य कोलकाताले ३८ बल बाँकी छँदै पछ्यायो । वेंकटेश ऐयर र श्रेयस ऐयरले अर्धशतकीय इनिङ्स खेल्दै टोलीलाई जित दिलाए । कप्तान श्रेयसले मात्र २४ बलमा ५८ रन जोडे । उनले यस क्रममा ५ चौका र ४ छक्का हिर्काए ।
त्यस्तै, वेंकटेशले २८ बलमा ५१ रन बनाए । उनले पनि ५ चौका र ४ छक्का प्रहार गरे । रहमानुल्लाह गुरबाजले २३ रन तथा सुनिल नरेनले २१ रनको योगदान दिए । हैदराबादका लागि प्याट कमिन्स र टी नटराजनले एक–एक विकेट हात पारे । यसअघि मिचेल स्टार्क र वरुन चक्रवर्तीको घातक बलिङसामु हैदराबाद १९.३ ओभरमा सबै विकेट गुमाउँदै १ सय ५९ रनमा सीमित बनेको थियो ।
स्टार्कले ३ तथा चक्रवर्तीले २ विकेट लिए । हैदराबादका लागि राहुल त्रिपाठीले सर्वाधिक ५५ रन बनाए । हेनरिच क्लासनले ३२ रन, कप्तान कमिन्सले ३० रन तथा अब्दुल सामदले १६ रन बनाउनु बाहेक अन्य ब्याट्सम्यानले खासै ठुलो योगदान दिन सकेनन् । कोलकाता दुई पल्टको च्याम्पियन हो । आईपीएलका समान ५ पटकका च्याम्पियन टोली चेन्नई र मुम्बई भने उपाधि होडबाट बाहिरिसकेका छन् ।
