Nepal Times
Nepal Times
3
Shares

बालेनले काठमाडौंका सबै शौचालय निःशुल्क बनाए

बालेनले काठमाडौंका सबै शौचालय निःशुल्क बनाए

१८ वैशाख, काठमाण्डौ ।
स्वतन्त्र मेयर बालेन्द्र शाह बालेनले नेतृत्व गरिरहेको काठमाडौं महानगरपालिकाले नगर भित्रका सबै सार्वजनिक शौलाचय निःशुल्क बनाएको छ । अब नगरका सार्वजनिक शौचालयहरूमा पैसा लाग्ने छैन् । यसअघि भने काठमाडौँ महानगरपालिका क्षेत्रभित्र रहेका सार्वजनिक शौचालयहरूले ५ र १० रुपैयाँ लिइरहेका थिए ।

काठमाडौं महानगरले सूचना प्रकाशित गरेर अब शुल्क नलाग्ने बताएको हो । ‘काठमाडौँ महानगरपालिका क्षेत्रभित्र सार्वजनिक उपयोगमा रहने गरी निर्माण गरिएका तथा सञ्चालनमा रहेका सार्वजनिक शौचालयहरूमा सेवाग्राहीसँग कुनै शुल्क नलिने व्यवस्था भएको छ,’ सूचनामा उल्लेख छ ।

निःशुल्क रूपमा सञ्चालित सार्वजनिक शौचालयका लागि काठमाडौँ महानगरपालिकाले आवश्यकता अनुसार जनशक्ति, सामग्री, मर्मत सम्भार र सरसफाइ सहयोग उपलब्ध गराउने भएकाले नै शुल्क हटाउन लागेको हो । सेवाग्राहीसँग शुल्क लिई सञ्चालन गरिरहेका सार्वजनिक शौचालयका सञ्चालक र व्यवस्थापकहरूले यो सूचना प्रकाशित भएको मितिले १५ दिनभित्र महानगरपालिकाको सार्वजनिक निजी साझेदारी एकाइमा लिखित प्रस्ताव पेस गर्न अनुरोध गरेको छ ।

सूचना विपरीत सार्वजनिक शौचालयको प्रयोग बापत कुनै प्रकारको शुल्क असुल गरेमा प्रचलित कानुन बमोजिम कारबाही गरिने महानगरले बताएको छ । कुनै सरकारी निकाय, गैरसरकारी संस्था वा निजी क्षेत्रबाट आफ्नो परिसरभित्र वा बाहिर सार्वजनिक शौचालय सञ्चालन गरिरहेको हकमा समेत निःशुल्क शौचालय सेवा उपलब्ध गराउनु पर्ने महानगरले जनाएको छ ।

दुई वर्ष अघि महानगरका मेयर बालेन्द्र शाह (बालेन) नेतृत्वमा बसेको प्रथम नगर कार्यपालिका बैठकमा निजी क्षेत्रका शौचालयलाई सार्वजनिक प्रयोजनका लागि आह्वान गर्ने निर्णयभएपछि विभिन्न क्षेत्रले शौचालयलाई सार्वजनिक गर्न महानगरसँग सम्झौता गरेका थिए । महानगरले पेट्रोल पम्पमा रहेका शौचालयहरु पनि सार्वजनिक प्रयोगका लागि खुल्ला गर्नुपर्ने निर्णय गरेको छ ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.