१८ जेठ , काठमाण्डौ ।
स्वतन्त्रबाट मेयरमा निर्वाचित भएपनि सबै दलीय रुपमा उम्मेदवारी दिएर निर्वाचित भएका वडाध्यक्षहरुसँग मिलेरै काम गर्दै आएका काठमाडौैं महानगरपालिकाका मेयर बालेन्द्र शाह बालेन र वडाध्यक्षबीच कार्यपालिका बैठकमै चर्काचर्की परेको छ । मेयर शाह र वडा नम्बर २२ का वडाध्यक्ष चिनिकाजी महर्जनबीच कार्यपालिका बैठकमै न्यूरोडको सडकलाई लिएर चर्काचर्की भएको हो ।
शुक्रबार बसेको कार्यपालिका बैठकमा वडाध्यक्ष महर्जनले न्यूरोड क्षेत्रमा फुटपाथ विस्तार भइरहेको कुरा पत्रपत्रिकाबाट थाहा पाउनु परेको बताएपछि विवाद सुरु भएको थियो । ‘देशकै एक ल्याण्डमार्क शहरमा पेटी बनाउने कुरा मैले पत्रिका पढेर थाहा पाउनुपर्ने, यो किन भइरहेको छ?,’ वडाध्यक्षले बैठकमा प्रश्न गरे। उनले आफू सौताको छोरा हो ? मसँग किन यस्तो व्यवहार गरिन्छ भनेपछि न्यूरोडकै विषयमा सडक विभागको कारबाही चेतावनी पाइसकेका मेयर बालेनले फुटपाथ विस्तारको काम वडा नम्बर २४मा भएकाले वडा नम्बर २२का वडाध्यक्षले आपत्ति जनाउनुपर्ने विषय नरहेको बताए।
बालेनले कार्यपालिका बैठकमा वडा नम्बर २४ का वडाध्यक्ष विनोदकुमार राजभण्डारीले इन्द्रचोकदेखि विशाल बजारको क्षेत्रको फुटपाथमा मान्छेलाई हिँड्न गाह्रो भएको, लुटपाट, दुर्व्यवहार, पाकेटमार लगायतका घटना भएको भनेर गुनासो गरेको जानकारी दिएका थिए। त्यसपछि वडाध्यक्षकै पहलमा फुटपाथ विस्तारको काम अघि बढाएको र त्यसमा वडा नम्बर २२ का वडाध्यक्षलाई कुनै समस्या नहुनुपर्ने मेयरले बताएका थिए।
‘२४ मा काम भइरहेको छ। २२ मा काम भएकै छैन, तपाईंलाई के समस्या भो?,’ मेयर शाहले वडाध्यक्ष महर्जनलाई प्रश्न गरे। जवाफमा वडाध्यक्ष महर्जनले समग्र न्युरोड क्षेत्रको बारेमा आवाज उठाएको बताएका थिए। ‘न्यूरोड कहाँ पर्छ, न्यूरोडको भूगोल कहाँ पर्छ? अहिले भूगोलको विषयमा तपाईंलाई ज्ञान नभएको हो?,’ उनको प्रश्न थियो। वडाध्यक्ष महर्जनले न्यूरोड क्षेत्रमा फुटपाथ विस्तार गर्न एकीकृत टेण्डरमा गएको हुँदा एउटा वडाको मात्र विषय नहरहेको बताएका थिए।
त्यसैबीचमा मेयर बालेन र वडाध्यक्षको लामो सवाल–जवाफ भएपछि वडा नम्बर १७ का वडाध्यक्षले दुई जनाले दोहोरी खेलेर निचोडमा पुग्न नसकिने बताएका थिए। ’यसलाई लामो कुरा गरेर टुंग्याउन सकिँदैन,’ उनले भने, ’दुई जनाको मात्र दोहोरी मात्र खेलेर पनि हुँदैन।’ त्यस्तै, समिति गठन गरी अध्ययन गरेर प्रतिवेदनले सुझाए अनुसार काम गर्न आग्रह गरेका थिए ।
न्यूरोडको सडकको विषयलाई लिएर मेयर बालेन पछिल्लो केही दिन यता चर्चामा छन् । उनले भौतिकपूर्वाधार मन्त्री रघुवीर महासेठलाई धुलो उपहार पठाएपछि सडकविभागले उनलाई न्यूरोडमा सडक काटिएको विषयमा कारबाहीसहितको पत्र पठाएको छ ।
जसको जवाफ बालेनले आजै दिएका छन् । बालेनलले उल्टै सडक विभागमाथि फुटपाथको मापदण्डको बारेमा प्रश्न गरेका छन् । मेयर बालेनले कार्यपालिका बैठकमा सडक विभागको पत्र गैरकानूनी रहेको भन्दै कानूनी उपचार खोज्ने पनि बताएका छन् ।
