२५ जेठ ,काठमाण्डौ।
सरकारले ११ देशका राजदूत फिर्ता बोलाउने निर्णय गरेको छ । मन्त्रिपरिषद्को बिहीबार बसेको बैठकले भारत र अमेरिकासहित ११ राजदूतलाई फिर्ता बोलाउने निर्णय गरेको हो । मन्त्रिपरिषदको बैठकले कांग्रेस कोटाबाट नियुक्त राजदूत फिर्ता बोलाउने निर्णय गरेको हो । फिर्ता हुनेमा भारतका शंकर शर्मा, अमेरिकाका श्रीधर खत्री, बेलायतका ज्ञानचन्द्र आचार्यसमेत छन् ।
सञ्चारमन्त्री रेखा शर्माका अनुसार अमेरिका, भारत, बेलायत, कतार, साउदी अरब, दक्षिण कोरिया, मलेसिया, स्पेन, पोर्चुगल, डेनमार्क र इजरायलका राजदूत फिर्ता बोलाउने निर्णय भएको हो । फिर्ता हुनेमा इजरालयकी कान्ता रिजाल, साउदी अरवमा नवराज सुवेदी, कतारका नरेश ढकाल, मलेसियाका डिल्लीराम पौडेल, डेनमार्कका रामस्वार्थ राय, स्पेनकी शर्मिला पराजुली, पोर्चुगलका शनिल नेपाल र दक्षिण कोरियाका डा. ज्योती प्याकुरेल समेत छन् ।
फिर्ता भएकामा नवराज सुवेदी र रामस्वार्थ राय जसपाको कोटाबाट राजदूत नियुक्त भएका थिए भने बाँकी काग्रेसकै कोटाबाट राजदूत नियुक्त भएका थिए । एमालेसँगको सहकार्यमा रहेको वर्तमान सरकारले राजदूतहरुलाई फिर्ता बोलाएको हो । एमाले सरकारमा सहभागी भएको तीन महिना पुगिसकेको र अघिल्लो सरकारको राजनीतिक नियुक्ति पुनरावलोकन नभएको भन्दै ओलीले प्रधानमन्त्रीसँग गुनासो गरेका थिए ।
आइतबारको भेटघाटमा पनि उनले यो कुरा दोहोर्याएपछि प्रधानमन्त्रीले ती राजदूतहरुको फिर्ताका लागि तयारी थाल्न परराष्ट्रलाई आग्रह गरेका थिए । सरकारमा दलहरुको गठबन्धन फेरिने बित्तिकै यसको असर राजदूतहरुमाथि पर्ने गरेको छ । यसअघि २०७८ मा पनि तत्कालिन केपी शर्मा ओली नेतृत्वको सरकारले नियुक्त गरेका विभिन्न देशका राजदूतलाई शेरबहादुर देउवा नेतृत्वको सरकारले फिर्ता बोलाएको थियो ।
तत्कालिन ओली सरकारले ११ जना राजदूत नियक्त गरेको थियो । तत्कालीन समयमा कृष्णचन्द्र शर्मा (दक्षिण कोरिया) सुम्निमा तुलाधर (अष्ट्रेलिया) रमेशचन्द्र पौडेल (श्रीलंका), नारायणप्रसाद संग्रौला (म्यानमार) कुलप्रसाद नेपाल (ब्राजिल), सुमित्रा सुवेदी ( डेनमार्क) मेराज मुसलमान (साउदी अरेयिबा) र जंगबहादुर चौहानलाई (रसिया)बाट फिर्ता बोलाइएको थियो ।
