२४ असार , एजेन्सी ।
फ्रान्सका सम्राट् नेपोलिअन बोनापार्टको स्वामित्वमा भएका दुइटा पिस्तोल १६.९ लाख यूरो (झन्डै २४.५ करोड नेपाली रुपैयाँ) मा लिलाम भएका छन् । कुनै बेला ती हतियार प्रयोग गरेर उनले आत्महत्या गर्न खोजेको ठानिन्छ । बीबीसीका अनुसार प्यारिसस्थित बन्दुक उत्पादक ’लुई–मारिन गोसे’मा बनेका ती पिस्तोल १२ लाखदेखि १५ लाख यूरोमा बिक्री हुने अपेक्षा राखिएको थियो ।
’ओजनाट अक्शन हाउस’मा ती पिस्तोलको लिलामी गरिएको थियो । उक्त लिलाम गृह नेपोलिअनले सन् १८१४ मा गद्दी परित्याग गरेपछि आत्महत्या गर्ने प्रयास गरेको फोँटेन्ब्लो दरबारनजिकै छ । केही समयअघि फ्रान्सको संस्कृति मन्त्रालयले ती पिस्तोललाई “राष्ट्रिय सम्पत्ति“ घोषणा गर्दै तिनलाई विदेश पठाउन रोक लगाउने निर्णय गरेको थियो । अब ती पिस्तोल अस्थायी रूपमा मात्र फ्रान्सबाट बाहिर लैजान पाइन्छ ।
अब फ्रान्स सरकारले ती पिस्तोल किन्ने व्यक्तिसँग ३० महिनाभित्र ती हतियार सकार्न सक्छ । उनको नाम सार्वजनिक गरिएको छैन । ती दुवै पिस्तोलमा सुन र चाँदीका बुट्टा छन् । तिनमा नेपोलिअनको मुखाकृति पनि अङ्कन गरिएको छ । विदेशी फौजसँग आफ्नो सेना पराजित भएपछि नेपोलिअन बोनापार्ट सत्ता त्याग्न बाध्य भएका थिए ।
त्यसपछि सन् १८१४ को एप्रिल १२ को राति नेपालिअनले ती पिस्तोल प्रयोग गर्न खोजेको बताइन्छ । तर उनका वरिष्ठ सैन्य अधिकारी आर्माँ ड कोलाँकूरले ती पिस्तोलबाट बारुद हटाइदिएका थिए । त्यसपछि नेपोलिअनले विष सेवन गरे। तर उनको मृत्यु भएन । पछि नेपोलिअनले ती पिस्तोल कोलाँकूरलाई दिए। ती हतियार कोलाँकूरको परिवारको स्वामित्वमा रहँदै आयो ।
पिस्तोल राखिएको बाकस अनि बारुद राख्ने सिङ र बारुद खाँद्न प्रयोग गरिने छडीहरूसहित अन्य सामग्री पनि सँगै बिक्रीमा राखिएको थियो । गत नोभेम्बरमा नेपोलिअनको छविसँग जोडिएको टोपी १९ लाख यूरो (२७.४८ करोड रुपैयाँ) बिक्री भएको थियो । सन् २०१४ मा पनि नेपोलिअनको अर्को टोपी १९ लाख यूरोमै बिक्री भएको थियो । सन् १८२१ को मे ५ मा उनको मृत्यु भयो । मृत्यु हुँदा उनी दक्षिण आन्ध्र महासागरस्थित सेन्ट हेलेना टापुमा ब्रिटिश कारागारमा थिए ।
