२५ असार, विराटनगर ।
दुई दिने औपचारिक भ्रमणका लागि मस्को पुगेका भारतीय प्रधानमन्त्री नरेन्द्र मोदी रुसी सेनामा रहेका भारतीयलाई फिर्ता पठाउनका लागि राष्ट्रपति भ्लादिमिर पुटिनलाई फकाउन सफल भएका छन् । मोदीसंगको भेटपछि रूसी सेनामा कार्यरत भारतीय नागरिकलाई छाड्न राष्ट्रपति भ्लादिमिर पुटिन सहमत भएका हुन् । नरेन्द्र मोदी अहिले रूसमा छन् ।
सोमबार साँझ भएको रात्रीभोजमा पुटिन र मोदीबीच वार्ता भएको थियो । जसमा मोदीले भारतीय नागरिकलाई फिर्ता गर्न राष्ट्रपति पुटिन समक्ष अनुरोध गरेको भारतीय समाचार संस्था एनडिटिभीले जनाएको छ । उक्त अनुरोधसँगै रूसले युक्रेनविरूद्धको युद्धमा सहभागी भएका भारतीय नागरिकलाई फिर्ता गर्ने सहमति जनाएको हो । त्यस्तै उनीहरूलाई फिर्ता गर्न सहजीकरण समेत गरिदिने समाचारमा उल्लेख छ ।
एनडिटिभीका अनुसार कम्तिमा दुई जना भारतीय नागरिकको युद्धमा मृत्यु भएको छ । रुसमा ठूलो संख्यामा नेपालीहरु रुसी सेनामा भर्ती भएपनि उनीहरुलाई स्वदेश फर्काउन नेपाल सरकारको पहल भने अझै प्रभावकारी बन्न सकेको छैन् । परराष्ट्र मन्त्री नारायणकाजी श्रेष्ठले रुसी समकक्षी सर्जियो लाभरोभसँग टेलिफोन संवादमा नेपालीको स्वदेश फिर्ती र मृतकलाई क्षतिपूर्तिबारे ध्यानाकर्षण गराएपनि रुसले अहिलेसम्म कुनै औपचारिक प्रतिक्रिया दिएको छै्रन् ।
रुसी सेनामा अवैध रुपमा भर्ती भएका डेढ दर्जन नेपालीको मृत्यु भइसकेको छ भने केही नेपाली अझै युक्रेनमा बन्दी जिवन बिताइरहेका छन् । सरकारसँग रुसी सेनामा रहेका नेपालीको आधिकारिक तथ्याङ समेत रहेको छैन् । यसैबीच मोदी मस्कोमै रहेकाबेला सोमबार मात्रै रूसले युक्रेनको राजधानी किभसहित विभिन्न सहरमा मिसाइल आक्रमण गरेको छ । उक्त आक्रमणबाट कम्तिमा ४१ जनाले ज्यान गुमाएका छन् ।
झण्डै दुई सय जना घाइते भएका छन् । रुसले हिजो युक्रेनको राजधानी कीभको एउटा बाल अस्पतालसहित मध्य र पूर्वी क्षेत्रमा हिजो दर्जनौँ मिसाइल आक्रमण गरेको थियो । हिजोको आक्रमणमा ४१ जनाको ज्यान गएको र १ सय ८४ जना घाइते भएका समाचार संस्था रोयटर्सले जनाएको छ । मारिनेमा तीन जना बालबालिका रहेका छन् ।
कीभको ओखमाटित बाल अस्पतालमा भएको आक्रमणले ठूलो चिन्ता सृजना गरेको युक्रेनी राष्ट्रपति भोलोदोमिर जेलेनेस्कीले बताएका छन् । रुसले युक्रेनका सबैजसो ठूला उर्जा केन्द्रमा आक्रमण गरेर जनजीवन कष्टकर बनाएको अवस्थामा अस्पताल लक्षित आक्रमणले थप चिन्ता थपेको उनले बताए । हिजो आक्रमणमा परेको बाल अस्पताल युरोपको सबैभन्दा महत्त्वपूर्ण अस्पतालमध्येकै एक थियो ।
यसले हजारौँ बालबालिकाको जीवन रक्षा र पुनर्स्थापना गर्दै आएको छ । हिजो रुसले युक्रेनका विभिन्न सहरमा ४० वटा भन्दा धेरै मिसाइल प्रहार गरेको खबरमा उल्लेख छ । हिजोको आक्रमणमा रुसले किन्जल हाइपरसोनिक मिसाइलको प्रयोग गरेको थियो । जुन रुसको सबैभन्दा उन्नत हतियार हो ।
किन्जल मिसाइल ध्वनिको गतिभन्दा १० गुणा छिटो उड्छ, यो मिसाइललाई रोक्न धेरै गाह्रो हुने युक्रेनी सेनाले जनाएको छ । पछिल्लो समय अमेरिका र युरोपले युक्रेनलाई अत्याधुनिक हतियार सहयोग गरेपनि रुसी सेनाको आक्रमण रोक्न हम्मेहम्मे परिरहेको छ ।
