४ साउन , एजेन्सी ।
विश्व फुटबलको सर्वोच्च निकाय फिफाले नयाँ वरीयता सार्वजनिक गरेको छ । फिफाले अद्यावधिक गरेको वरीयताअनुसार नेपाल १७५औँ स्थानमा यथावत् रहेको छ । नेपाल अघिल्लो वरीयता अनुसार यस पटक यथावत स्थानमा रहेको हो । नेपालले समग्रमा ९३५.९३ अंक प्राप्त गरेको छ । दक्षिण एसियाली वरीयतामा भने नेपाल तेस्रो स्थानमा कायम छ ।
दक्षिण एसियाली राष्ट्रमा नेपालभन्दा अगाडि भारत र माल्दिभ्स मात्रै रहेका छन । दक्षिण एसियाको शीर्ष राष्ट्र भारत तीन स्थान सुधार गर्दै एक सय २४औं स्थानमा छ । तीन स्थान घटुवा भएको माल्दिभ्स एक सय ६३औं स्थानमा छ । नेपालभन्दा पछि एक स्थान माथि उक्लिएको भुटान एक सय ८२, एक स्थान नै सुधार गरेको बंगलादेश एक सय ८४, यथावत स्थानमा रहेको पाकिस्तान एक सय ९७ र श्रीलंका दुई सय पाँचौं स्थानमा छन ।
विश्व वरीयताको शीर्ष स्थानमा विश्वकप विजेता अर्जेन्टिना छ । कोपा अमेरिकाको उपाधि जितेपछि अर्जेन्टिनाले शीर्ष वरीयता थप मजबुद बनाएको हो । फ्रान्स, स्पेन, इङ्ल्यान्ड, ब्राजिल, बेल्जियम, नेदरल्यान्ड्स, पोर्चुगल, कोलम्बिया र इटाली दोस्रो देखि क्रमश रहदै १०औं स्थान भित्र रहेका छन । इङ्गल्यान्ड एक स्थान सुधार गर्दै चौथौ स्थानमा उक्लिँदा ब्राजिल एक स्थान तल झर्दै पाँचौँ स्थानमा पुगेको हो ।
युरो कप च्याम्पियन स्पेन पाँच स्थान सुधार गर्दै तेस्रो स्थानमा आइपुगेको हो । स्पेन यसअघि आठौँ स्थानमा थियो । यस्तै फिफा वरीयतामा भेनेजुएला एकैपटक १७ स्थान माथि उक्लिएको छ । यसअघि ५४ औँ स्थानमा रहेको भेनेजुएला १७ स्थान माथि उक्लिँदै ३७ औँ स्थानमा आइपुगेको हो । वरीयतामा चेक रिपब्लिक एकैपटक १३ स्थान तल झरेको छ ।
यसअघि ३४ औँ स्थानमा रहेको चेक रिपब्लिक १३ स्थान तल झर्दै ४७ औँ स्थानमा पुगेको छ । यही जुन, जुलाईमा भएका तीन महाद्वीपीय तथा अन्य थुप्रै अन्तर्राष्ट्रिय प्रतियोगिताका आधारमा अन्तर्राष्ट्रिय फुटबल महासंघ (फिफा) ले नयाँ वरीयता निर्धारण गरेको हो । यी महिनामा संसारभर एक सय २५ भन्दा बढी अन्तर्राष्ट्रिय खेल भएको फिफाले जनाएको छ ।
