१० साउन , काठमाण्डौ।
लोकसेवा आयोगले लिने लिखित परीक्षाको पाठ्यक्रम फेरिएको छ । आयोगले अबदेखि शाखा अधिकृत, नायब सुब्बा र खरिदार तहको प्रथमपत्रमा उत्तीर्ण हुन ४५ अंक ल्याउनुपर्ने जनाएको छ । यसअघिसम्म ४० अंक ल्याए उत्तीर्ण हुने व्यवस्था थियो ।
‘लिखित परीक्षाको प्रथम चरणमा प्रारम्भिक परीक्षा हुनेछ, यस प्रारम्भिक परीक्षालाई छनोट परीक्षाको रुपमा मात्र लिई यस परीक्षाको प्राप्ताङ्कलाई मूल परीक्षाको अङ्कमा समावेश गरिनेछैन, यस परीक्षाको उतीर्णाङ्क पूर्णाङ्कको ४५ प्रतिशत अर्थात् ४५ अंक हुनेछ,’पाठ्यक्रम परिवर्तन गरिएको सूचनामा भनिएको छ ।
यसअघि पहिलो पत्रमा प्राप्त भएको कुल प्राप्तांकको ५० प्रतिशत अंक दोस्रो पत्रको प्राप्ताङ्कमा जोडिने व्यवस्था थियो। तर,अब हटेको छ ।
त्यस्तै,आयोगले लिखित परीक्षाको प्रथम चरणको परीक्षाबाट छनोट भएका उम्मेदवारलाई मात्र लिखित परीक्षाको द्वितीय चरणको मूल परीक्षामा सम्मिलित गराइने जनाएको छ ।
आयोगका अनुसार यो व्यवस्था आर्थिक २०८१÷८२ को विज्ञापनदेखि लागू हुनेछ । लोकसेवा आयोगकी प्रवक्ता गीताकुमारी होमेगाइँ तीन पदमा सुरुमा स्क्रिनिङ टेस्टको पाठ्य योजनामा परिवर्तन गरिएको बताउँछिन्।
‘स्क्रिनिङ टेस्टको नतिजाको ५० प्रतिशत अंक मूल परीक्षामा जोड्ने व्यवस्था थियो, अब नजोड्ने व्यवस्था गरेका छौं,’ उनले भनिन् ।
उनका अनुसार एउटा परीक्षाको नतिजालाई अर्को परीक्षाको नतिजासँग जोड्नु सान्दर्भिक नभएकाले एउटा परीक्षाले अर्को परीक्षालाई प्रभाव नपारोस् भन्ने उद्देश्य राखेर यस्तो व्यवस्था गरिएको हो ।
