१२ साउन , एजेन्सी ।
क्यानडामा जारी ग्लोबल टि ट्वान्टी लिगमा नेपाली क्रिकेट टोलीका अलराउन्डर दीपेन्द्रसिंह ऐरी र लेग स्पिनर सन्दीप लामिछानेआबद्ध टोलीले दोस्रो खेल खेल्नेछ । दीपेन्द्र र सन्दीपआबद्ध भ्यानकुवर नाईट्सले दोस्रो खेल आज खेल्दैछ । भेनकुवरले दोस्रो खेलमा बंगाल टाईगर्सको सामना गर्दैछ ।
भ्यानकुवर र बंगालबीचको खेल क्यानडाको सिएए सेन्टर, ब्राम्पटनमा नेपाली समय अनुसार शनिबार राति पौने ९ बाट सुरु हुदैछ । भ्यानकुवर पहिलो खेलमा टोरोन्टो नेसनल्ससँग ८ विकेटले पराजित भएको थियो । त्यो खेलमा सन्दीपले १ विकेट लिनुका साथै १५ रन समेत जोडेका थिए ।
भिसा समस्याका कारण क्यानडा पुग्नमा ढिलाई भएका कारण पहिलो खेल गुमाएका अलराउन्डर दीपेन्द्र आजको खेलमा भने उपलब्ध हुनेछन् । ढिला क्यानडा पुगेको कारण पहिलो खेल गुमाएका नेपाली कप्तान रोहित कुमार पौडेलसम्मिलित टोलीले आइतबार बिहान आफ्नो दोस्रो खेल खेल्नेछ ।
रोहितआबद्ध टोरोन्टो नेसनल्सले दोस्रो खेलमा ब्रैम्प्टन वुल्भ्सको सामना गर्नेछ । नेसनल्स र वुल्भ्सबीचको खेल आइतबार बिहान पौने २ बजे सुरु हुनेछ ।
