२४ साउन , काठमाण्डौ।
आज दिउँसो भएको एयर डाइनेस्टीको हेलिकप्टर दुर्घटनामा ज्यान गुमाएका क्याप्टेन अरूण मल्ल १६ वर्षअघि पनि दुर्घटनामा परेको पाइएको छ । क्याप्टेन मल्ल २०७० असोज १० सोलुखुम्बुको लुक्लामा भएको दुर्घटना परेका थिए । सो दुर्घटनामा एयर डाइनेस्टी हेलिसर्भिसेसको हेलिकोप्टरका चालक क्याप्टेन मल्लसहित ३ यात्रु सवार थिए ।
डाइनेस्टीको ९ एन–एइएक्स (एएस–३५०) हेलिकप्टर अवतरणका क्रममा बिहान ८ः२० बजे दुर्घटनामा परेका थिए । काठमाडौं अन्तर्राष्ट्रिय विमानस्थलबाट बिहान ०७ः२८ बजे सोलुखुम्बुका लागि उडान भरेको सो हेलिकप्टरमा तीन यात्रु सवार थिए । त्यतिबेला अवतरणका क्रममा तारमा ठोक्किएर डाइनेस्टीको हेलिकप्टर लुक्ला विमानस्थलमा दुर्घटना भएको थियो ।
अवतरण गर्न खोज्दा विमानस्थल वरपर बारिएको तारमा ठोक्किएको थियो । लुक्लामा दुर्घटनामा पर्नुअघि मल्लले उडाएको हेलिकप्टरलाई तत्कालीन समयमा जनयुद्धमा रहेको माओवादीले अपहरण समेत गरेको थियो । क्याप्टेन मल्लले ३५ वर्ष भन्दा बढी हेलिकप्टर उडाइ सकेका थिए । उनका परिवारमा श्रीमती र दुई छोरी छन् । आज नुवाकोटको सूर्यचौरमा भएको हेलिकप्टर दुर्घटनामा क्याप्टेन मल्लसहित ५ जनाको निधन भएको छ ।
हेलिकप्टरमा चार चिनियाँ यात्रु सवार थिए । सो हेलिकप्टर त्रिभुवन विमानस्थलबाट उडेको तीन मिनेटपछि नै काठमाडौं विमानस्थलमा रहेको टावरसँग सम्पर्क विच्छेद भएको थियो । दिउँसो १ बजेर ५४ मिनेटमा काठमाडौं विमानस्थलबाट रसुवाको स्याफ्रुबेंसीका लागि ४ जना यात्रु (चिनियाँ नागरिक) लिएर उडेको थियो ।
नेपाल नागरिक उडड्यन प्राधिकरण, खोज तथा उद्धार समन्वय केन्द्रले बुधबार जारी गरेको विज्ञप्तिअनुसार सो हेलिकप्टर उडान गरेको ३ मिनेट पछि काठमाडौं टावरसँग सम्पर्क विच्छेद भई नुवाकोटको शिवपुरी गाउँपालिका–७ सूर्याचौरमा दुर्घटनामा परेको हो । यससंगै नेपाली आकाशमा १५ दिनको अन्तरालमा दुई ठूला हवाई दुर्घटना भएका छन् ।
त्रिभुवन अन्तर्राष्ट्रिय विमानस्थलमा सौर्य एयरलाइन्सको विमान दुर्घटना भएको १५ दिनपछि बुधबार नुवाकोटमा एयर डाइनेस्टीको हेलिकोप्टर दुर्घटनामा परेको हो । ९ साउनमा सौर्य एयरलाइन्सको विमान दुर्घटना हुँदा विमानमा सवार १९ जनामध्ये १८ जनाको मृत्यु भएको थियो । सो दुर्घटनामा क्याप्टेन मनिषरत्न शाक्य भने बाँचेका थिए । आज हेलिकोप्टर दुर्घटनाको कारण खुल्न सकेको छैन ।
