२६ साउन, काठमाण्डौ ।
खेलक्षेत्रको विभिन्न विधामा पावर हाउस रहेको छिमेकी मुलुक भारतमा पछिल्लो समय नेपाली खेलाडीहरु अनुबन्धन हुने क्रम पनि बढेको छ । चाहे क्रिकेट होस् वा फुटबल भारतीय क्लबहरुले नेपाली खेलाडीमाथि बोली लगाउन थालेका छन् । आईपीएल क्रिकेटमा नेपालका स्टार लेग स्पीनर संदीप लामिछानेले सहभागिता जनाइसकेका छन् भने फुटबल प्रतियोगिताहरुमा नेपाली खेलाडी अनुबन्ध हुने क्रम बढ्दो छ ।
महिला फुटबलमा त नेपालका खेलाडीहरुले त्यहाँ रेकर्ड नै बनाएका छन् । नेपालबाट खेलाडीमात्रै होइन प्रशिक्षकसमेत भारतले अनुबन्ध गराएको छ । पछिल्लो पटक नेपाली प्रशिक्षक मनीष तिम्सिनालाई पनि इन्डियन सुपर लिग (आइएसएल) टोली पन्जाब फुटबल क्लबको गोलकिपर प्रशिक्षक नियुक्त भएका छन् । पन्जाबले शुक्रवार आफ्नो सामाजिक सञ्जालमार्फत तिम्सिना गोलकिपर प्रशिक्षकका रुपमा आबद्ध भएको जनाएको छ ।
नेपाली राष्ट्रिय फुटबल टोलीका कप्तान किरण चेम्जोङले गत सिजन सम्म पन्जाबबाट व्यवसायिक फुटबल खेलेका थिए । यस अघि प्रशिक्षक तिम्सिना इन्डियन (आइ) लिग गोकुलम केरेला एफसीमा थिए गोलरक्षक प्रशिक्षक नियुक्त भएका छन् । एएफसी ए लाइन्स प्राप्त ३७ वर्षीय तिम्सिना सन् २०२१–२२ को सिजनका लागि केरेलामा आबद्ध हुँदै आइ लिग टोलीमा प्रशिक्षक बन्ने पहिलो नेपाली बनेका थिए ।
उनी ३ सिजन केरेलामा रहेका थिए । पछिल्लो छ महिना भने उनी नेपाली राष्ट्रिय टोलीको गोलकिपर प्रशिक्षकका रुपमा रहेका थिए । आइएसएल टोलीमा गोलकिपर प्रशिक्षक बन्ने पनि तिम्सिना पहिलो नेपाली बनेका छन् । ‘एक दशकदेखिको प्रशिक्षण, आइ लिग र राष्ट्रिय टोलीको अनुभवका कारण मैले अर्को मौकाका रुपमा आइएसएल टोलीमा आबद्ध भएको छु, तिम्सिनाले भने,’ यो मेरो लागि अवसर त हो नै । त्योसँगै आफूलाई थप प्रमाणित गर्ने चुनौती पनि हो ।’
एन्फाको धरान एकेडेमीका गोलकिपर प्रशिक्षकका रुपमा लामो समय काम गरेका तिम्सिनाले खेलाडीका रुपमा थ्री स्टार, आरसिटी, हिमालयन शेर्पा, बाँसबारी, स्वयम्मु, ब्रिगेड ब्वाइजबाट खेलिसकेका छन् । पूर्वाञ्चलबाट पाँचौ राष्ट्रिय खेलकुदमा स्वर्ण पदक जितेका तिम्सिना एक दशक यता प्रशिक्षणमा सामेल छन् । विराटनगरका उनले साफ यू १५ मा नेपाली टोलीको गोलकिपर प्रशिक्षकको भूमिका पनि निर्वाह गरिसकेका छन् ।
यसैबीच यता तीनवटा विश्वकप खेलिसकेका जापानी फुटबल खेलाडी केसुके होन्डासम्मिलित भुटानी क्लब पारो एफसी नेपाल आइपुगेको छ । टोली शनिबार बिहान काठमाडौं आइपुगेको हो । एफसी च्यालेन्ज लिग छनोटको प्लेअफ अन्तर्गत चर्च ब्वाइज युनाइटेडविरुद्धको खेल्न पारो नेपाल आएको हो । यी दुईबीचको खेल मंगलबार दशरथ रंगशालामा साँझ ६ बजे हुनेछ ।
