२६ साउन, काठमाण्डौ ।
भूटानको लिग च्याम्पियन पारो फुटबल क्लव एएफसी च्यालेन्ज लिग छनोटको प्लेअफ खेल्न शनिवार बिहान नेपाल आइपुगेको छ । चर्च ब्वाइज युनाइटेड क्लबका अध्यक्ष रुबेन राई र पदाधिकारीहरूले टोलीलाई त्रिभुवन विमानस्थलमा स्वागत गरे । पारो एफसी यो पटक निकै प्रभावशाली रहने अनुमान गरिएको छ । उसले जापानका स्टार केसुके होन्डालाई टिममा भित्राएको छ ।
होन्डाले तनि पटक विश्कप खेलिसकेका छन् । उनी एशियाकै स्टार खेलाडी हुन् । होन्डाको आगमनसँगै टिम मजबुत बनेको टिमको बुझाई छ । होन्डा मात्र होइन यो पटक पारो कुल १२ विदेशी खेलाडी दर्ता गर्दै टिमलाई मजबुत बनाएको छ । क्लवले गरेको लगानी अत्याधिक छ । यही कारण टिमलाई जित्नै पने दबाब समेत रहेको छ । तयारी पनि उत्कृष्ट रहेको र होन्डाको आगमनले टिम आत्मविश्वासी रहेको र उनकै वरिपरि रहेर टिम तयार पारिएको प्रशिक्षक पुष्पलाल शर्माले बताए ।
गत वर्ष पनि पारो एफसी कप छनौट खेल्न नेपाल आएको थियो । त्यतिखेर मच्छिन्द्र क्लवसँग पारजित भएको थियो । यो पटक भने टिम पेपरमा निकै मजबुत देखिएको छ । खेल मंगलवार दशरथ रंगशालामा साँझ ६ बजे हुनेछ । यता चर्च ब्वाइज युनाइटेडका प्रशिक्षक बालगोपाल महर्जनले एएफसी च्यालेन्ज लिगको प्ले अफका लागि टोली तयार रहेको बताएका छन् ।
पारोमा विदेशी खेलाडीको संख्या बढी भएपनि राष्ट्रिय खेलाडी, विदेशी खेलाडीसहितको आफ्नो टोली सन्तुलित रहेको बताए । चर्च ब्वाइजले तयारीका क्रममा त्रिभुवन आर्मी फुटबल क्लबसँग २ र नेपाली यु २० को टोलीसँग ३ वटा मैत्रीपूर्ण खेल खेलेको प्रशिक्षक महर्जनले बताए। चर्च ब्वाइजले ३ विदेशी सहित २३ जना खेलाडी अनुबन्ध गरेको छ । साउन १ गते देखि टोली प्रशिक्षणमा व्यस्त रहेको बताइएको छ । टोलीको कप्तानी अनन्त तामाङ तथा उपकप्तानमा एरिक विष्ट छन् ।
यस्तै टोलीमा अञ्जन विष्ट, आयुष घलान, लाकेन लिम्बू, दीप कार्की, टेकेन्द्र सिंह थापा, रेम्बो कुमार चौधरी,सञ्जीव बिष्ट, छिरिङ्ग लामा, सनिश श्रेष्ठ, सौभाग्य राई, सन्तोष खत्री, रोहन कार्की, विवेक पौडेल, निरज चौधरी, एकराज बुढाथोकी, योगेश गुरुङ, मनिष कुमार जर्गा, आदित्य शाक्य, यस्तै नाइजेरियाका ओमोलाजा नुरेन करीम, जाम्बियाका पिटर बान्दा र घानाका मोजेस ग्याबा त्वाम रहेका छन् ।
