२७ साउन, काठमाण्डौ।
गायक प्रकाश तिमिल्सिनाको निधन भएको छ । तिमिल्सिना ललितपुर महानगरपालिका–१८ आदिनाथ मार्गस्थित आफ्नै कोठामा मृत अवस्थामा फेला परेको ललितपुर प्रहरी प्रवक्ता नरेशराज सुवेदीले जानकारी दिए । सुवेदीका अनुसार तिमिल्सिना शनिबार राति ९ बजेतिर बेडमा मृत भेटिएका हुन् ।
परिवारका सदस्यहरूले अचेत अवस्थामा रहेका उनलाई तत्काल पाटन अस्पताल पु¥याएका थिए । तर चिकित्सकले उनलाई मृत घोषित गरे । उनको शवको पोस्टमार्टम पनि गरिएको छ । उनको पार्थिव शरीर श्रद्धाञ्जलीका लागि संगीत तथा नाट्य प्रज्ञाप्रतिष्ठानमा राखिएको थियो । तिमिल्सिनाको अन्तिम संस्कार पशुपति आर्यघाटमा गरिएको छ ।
दृष्टिविहीन गायक तिमिल्सिनाका ‘प्रिय तिम्रो सिउँदोमा सिन्दूर भर्न देऊ ‘, ‘तिम्रो हातको सिन्दूर’, ‘जुन भन्दिन’, ‘नमान लाज यसरी’, ‘नआए नि हुन्थ्यो’ लगायतका थुप्रै गीतहरू चर्चित छन् । यसबाहेक उनले धेरैवटा लोकप्रिय गीतका कभर भर्सन पनि गाएका छन् । तिमिल्सिना गायन प्रतियोगिता ‘नेपाली तारा’बाट उदाएका थिए ।
दर्जनौँ गीतले उनलाई नेपाली सङ्गीत प्रेमीहरू माझ एक परिचित र सम्मानित गायकका रूपमा स्थापित गराएको थियो । विभिन्न रेडियो र टेलिभिजन कार्यक्रमहरू तथा दुई दर्जन बढी देशका साङ्गीतिक कार्यक्रममा सहभागी भएर उनले आफूलाई नेपाली सङ्गीतमा स्थापित गरेका थिए ।
उनको मृत्यु के कारणले भन्ने अहिले खुलिनसकेको सुवेदीले बताएका छन् । ‘मुखमा रगत र फिँज देखिएको छ’, सुवेदीले भनेका छन्,‘अहिले मृत्युको कारणबारे केही पनि अनुमान गर्न सकिने अवस्था छैन।’ पोस्टमार्टमको रिपोर्ट आएपछि केही खुल्ला’ । उनका अनुसार गायक तिमिल्सिना राति कोठामा एक्लै थिए ।
२०४५ सालको भूकम्पपछि आएको बाढीका कारण उनले दुवै आँखाको ज्योति गुमाएका थिए । उनी सप्तकोशीमा आएको बाढीले सुनसरीको आफ्नो घरसँगै बुवाआमासमेत गुमाएका प्रकाशलाई माछा मार्ने क्रममा माझीले उद्दार गरेका थिए ।
भारतको कोलकातामा सम्पन्न साउथ एशियन स्टारमा सहभागी भएपछि गायक तिमिल्सिना चर्चामा आएका थिए । कोलकाताको उक्त प्रतियोगितामा तिमिल्सिनाले बेस्ट ईङ्लिश प्रोनाउन्सेसनको अवार्ड पनि जितेका थिए । तिमिल्सिना संगीतलाई नै आफ्नो जीवनको सर्वश्व ठान्थे।
