३० साउन, विराटनगर । प्रधानमन्त्री केपी शर्मा ओलीले दुवै हात नभएका गणेश राईलाई आफ्नो सचिवालयमा पुनः नियुक्त गरेका छन् । प्रधानमन्त्री ओलीले खोटाङको जन्तेढुंगा गाउँपालिका-३ मा जन्मिएका राईलाई कम्प्युटर अपरेटरमा नियुक्त गरेका हुन् ।
यसअघि ओलीले आफू पहिलो पटक २०७२ असोज २४ गते प्रधानमन्त्री हुँदा राईलाई सचिवालयमा नियुक्त गरेका थिए । त्यसबेला उनले सहरी विकास मन्त्रालयअन्तर्गतको डिभिजन कार्यालय काठमाडौंमा नियुक्ति पाएका थिए । तर, ओली बाहिरिएसँगै राई पनि सेवाबाट बाहिरिए ।
२०७४ सालमा ओली दोस्रोपटक प्रधानमन्त्री नियुक्त भएपछि पुन: राईलाई प्रधानमन्त्री कार्यालयमा बोलाए र नियुक्ति दिए । २०७४ यता तत्कालीन प्रधानमन्त्रीद्वय शेरबहादुर देउवा र पुष्पकमल दाहाल ‘प्रचण्ड’ सरकारको पालामा पनि राई प्रधानमन्त्री तथा मन्त्रिपरिषद्को कार्यालयमा कार्यरत थिए ।
पछिल्लो समय भने दरबन्दी काटिएसँगै उनले सेवाबाट बाहिरनु परेको थियो । तर, फेरि वर्तमान प्रधानमन्त्री ओलीले उनलाई तेस्रो पटक आफ्नो सचिवालयमा काम गर्ने अवसर दिएका हुन् ।
परिवारमा ६ भाइमध्ये गणेश साहिँला हुन् । जन्मजात दुवै हात नभएपछि थुप्रै प्रश्नको सामना गर्दै आएका उनी कक्षा १२ सम्मको अध्ययन गाउँमा सकेर दिक्तेल पुगेका थिए ।दिक्तेलस्थित एक कम्प्युटर सेन्टरबाट कम्प्युटर सिकेर उनी २०७२ सालमा अध्ययनकै सिलसिलामा काठमाडौं प्रवेश गरे । अनेरास्ववियुका विद्यार्थी नेताबाट ओलीसँग भेट भएपछि उनको जीविक सहज बनेको हो ।
