३० साउन , काठमाण्डौ।
उद्योग, बाणिज्य तथा आपूर्ति मन्त्री दामोदर भण्डारीले त्रिभुवन विमानस्थलस्थित हवाई इन्धनको डिपो सार्न भारतसंग सहयोग मागेका छन् । यसका लागि आवश्यक पर्ने आर्थिक तथा प्राविधिक सहयोग जुटाइदिन उनले इण्डियन आयल कर्पोरेशन(आईओसी) सँग माग गरेका हुन् ।
गत विहीबार मन्त्री भण्डारीले नयाँ दिल्लीमा आईओसीका उच्च अधिकारीसँग छलफल गर्दै विमानस्थलको हवाई इन्धन डिपो अन्य स्थानमा सार्न आवश्यक पर्ने आर्थिक तथा प्राविधिक सहयोग माग गरेका हुन् । मन्त्री भण्डारीले आईओसीको एभिएसन फ्युल स्टेशन तथा इथानोल व्लेण्डिङ्ग स्टेशनको समेत अवलोकन गरेका थिए ।
उक्त हवाई इन्धन डिपो विशिष्टीकृत निकायको आर्थिक र प्राविधिक सहयोगमा मात्रै सार्न सकिन्छ । यस्तो विशिष्टीकृत बिशेषता आईओसीसँग मात्रै रहेको ठहर गर्दै आर्थिक तथा प्राविधिक सहयोगका लागि छलफलको क्रममा मन्त्री भण्डारीले आईओसीका उच्च अधिकारीसमक्ष आग्रह गरेका हुन् ।
त्रिभुवन अन्तर्राष्ट्रिय विमानस्थलको हवाई यातायात क्षमता अभिवृद्धि आयोजना निर्देशनालयले विमानस्थलको मास्टर प्लानअनुसार विमानस्थलको उत्तरतर्फ नेपाली सेनाको गल्फ कोर्स भवननजिकै डिपो सार्न करिब ५० रोपनी जग्गा पनि छुट्टयाइएको छ । डिपो सार्न विगत ३–४ बर्षदेखि आयोजनाले निगमलाई पत्राचार गर्दैआएको छ ।
निगमका एक पूर्वअधिकारीका अनुसार डिपो सार्ने योजना माफियाहरुको ठूलो सेटिङका कारण अघि बढ्न नसकेको हो । एक वर्षअघि सार्ने योजना अघि बढाए पनि विभिन्न स्वार्थ केन्द्रको अर्बौं रुपैयाँको चलखेल र सेटिङका कारण उक्त योजना अघि बढ्न सकेको छैन ।
यसअघि साउन १९ गते प्रधानमन्त्री केपी शर्मा ओलीले त्रिभुवन अन्तर्राष्ट्रिय विमानस्थलस्थित सिनामंगलमा रहेको मुलुककै सबैभन्दा ठुलो हवाई इन्धन डिपो उक्त स्थानबाट सार्न शुक्रबार निर्देशन दिएका थिए ।
उक्त डिपो उच्च जोखिमयुक्त स्थानमा रहेकाले अन्यत्र सार्न नव नियुक्त तीन राज्यमन्त्रीको शपथग्रहण कार्यक्रमलाई सम्बोधन गर्दै प्रधानमन्त्री ओलीले सुरक्षित स्थानमा डिपो सार्न सरोकारवाला मन्त्रालयलाई निर्देशन दिएका हुन् ।
त्रिभुवन अन्तर्राष्ट्रिय विमानस्थलभित्र सञ्चालनमा रहेको नेपाल आयल निगमको हवाई इन्धन डिपो ट्याक्सी वे र ट्याक्सी वे स्ट्रिपको क्षेत्रमा परेकाले सुरक्षाका दृष्टिकोणले सार्न त्रिभुवन अन्तर्राष्ट्रिय विमानस्थलस्थित हवाई यातायात क्षमता अभिवृद्धि आयोजनाले करिब ३ बर्षदेखि सार्न निगमलाई पत्राचार गर्दैआएको थियो ।
