१ भदाै, विराटनगर ।
नेपालमा अन्तर्राष्ट्रियस्तरको क्रिकेट म्याच हुने एउटामात्र मैदान छ । यो मैदानमा अन्तर्राष्ट्रियस्तरको पहिलो क्रिकेट म्याच एसीसी ट्रफी अन्तर्गत जापान र हङकङबीच ५ अक्टोबर सन् १९९८ मा भएको थियो ।
त्यसयता अन्तर्राष्ट्रिय म्याचहरू कीर्तिपुरस्थित त्रिवि क्रिकेट मैदानमै भइरहेका छन् । उक्त मैदान अन्तर्राष्ट्रियमात्र नभएर राष्ट्रिय र स्थानीय खेल खेल्ने एक मात्र मैदान पनि बनेको छ ।
जसकारण, टियू मैदान दशरथ रंगशालाकै अवस्थामा पुगिसकेको भनेर बेला-बेला चर्चा हुन्छ । तर, सोही मैदानमा खेलाउने गरी नेपालले अर्को थप अन्तर्राष्ट्रिय म्याचहरू पाएको छ ।
नेपालले आइसिसी १९ वर्षमुनि (यू-१९) क्रिकेट विश्वकप क्रिकेट एसिया छनोट-२०२५ को आयोजना गर्ने जिम्मा पाएको हो ।
नेपालले पाएको नेपाल क्रिकेट संघ (क्यान) ले आगामी अप्रिल १२ देखि २१ तारिखसम्म हुने उक्त छनोट प्रतियोगिताको आयोजनाको जिम्मेवारी पाएको जनाएको हो ।
क्यानका अनुसार छनोट प्रतियोगितामा आयोजक नेपालसँगै अफगानिस्तान, हङकङ, ओमान र संयुक्त अरब इमिरेट्स (युएई) छन् ।
नेपालबाहेक अरू टिमसँग क्रिकेट मैदानहरूको कमी छैन । तर, अब उक्त प्रतियोगिताका लागि नेपाल आउने टिमहरूले प्रशिक्षणसम्म राम्रो मैदानमा गर्न पाउँदैनन् ।
फेरि, दशरथ रंगशालाप्रति विदेशी खेलाडीले अपमानजनक टिप्पणी गरेजस्तै टियू मैदानका विषयमा क्रिकेट खेलाडीले पनि प्रतिक्रिया देलान् भन्ने चिन्ता-चासो उत्तिकै छ ।
विश्वकप छनोट खेलमा विजयी हुने टोलीले सन् २०२६ मा आयोजना हुने आइसिसी यु-१९ पुरुष विश्वकपमा प्रतिस्पर्धा गर्ने छ ।
