१ भदौ, काठमाडौं ।
प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवाबीच शनिबार दिउँसो भेटघाट भएको छ ।
प्रधानमन्त्रीको सरकारी निवास बालुवाटारमा भएको भेटवार्तामा सरकारले गरिरहेका र गर्नुपर्ने कामका विषयमा कुराकानी भएको छ ।
भेटको फोटो सार्वजनिक गर्दै प्रधानमन्त्री ओलीले राजनीतिक विमर्श भएको जानकारी गराए ।
भेटपछि प्रधानमन्त्री ओलीले फेसबुकमा लेखेका छन्, ‘आज शनिबार । नेपाली कांग्रेसका सभापति, पूर्वप्रधानमन्त्री, मेरा मित्र शेरबहादुर देउवाजीसँग कुराकानी भयो । केही जानकारी आदानप्रदान, केही राजनीतिक विमर्श भए । सरकारले गरिरहेका र गर्नुपर्ने कामका विषयमा पनि कुरा भए ।’
गत असार १७ गते मध्यराति प्रमुख दुई दल कांग्रेस र एमालेबीच नयाँ सरकार बनाउनेगरी सहमति भएपछि एमाले अध्यक्ष ओली प्रधानमन्त्री बनेका हुन् । सो सहमतिमा पहिला ओली र त्यसपछि देउवा प्रधानमन्त्री बन्ने विषय उल्लेख छ ।
