४ भदौ , एजेन्सी ।
अमेरिकी राष्ट्रपति जो बाइडेनमाथि महाअभियोगको मुद्या दर्ता भएको छ । अमेरिकी संसदमा रिपब्लिकनहरूले राष्ट्रपति बाइडेनको महाभियोगका लागि औपचारिक मुद्दा दर्ता गरेका छन् । उनीहरूले डेमोक्रेटिक नेसनल कन्भेन्सनको उद्घाटनको दिनको अवसर पारेर मुद्दा दर्ता गरेका हुन् । रिपब्लिकनहरूको नेतृत्वमा रहेको हाउस अफ रिप्रेजेन्टेटिभ्सका तीन शक्तिशाली समितिको प्रतिवेदनमा बाइडेनमाथि उनका छोरा हन्टरको विदेशी व्यापार मामिलासँग जोडिएको भ्रष्टाचारको आरोप लगाइएको छ ।
न्यायिक समितिका प्रमुख जिम जोर्डनले अनुसन्धानबाट बाइडेनले निजी प्रयोजनका लागि आफ्नो सार्वजनिक पदको दुरुपयोग गरेको देखिएको बताएका छन् । यद्यपि यसबारे बलियो प्रमाण भने रिपब्लिकनहरूसँग नभएको खबरमा उल्लेख छ । प्रतिवेदनमा लगाइएका आरोप बाराक ओबामाको उपराष्ट्रपतिका रूपमा सेवा गरेपछि बाइडेन कार्यालयबाट बाहिरिए पछिको अवधिसँग सम्बन्धित थिए ।
सेवानिवृत्त हुनुअघि डेमोक्रेटिक कन्भेन्सनमा भाषण दिन र उपराष्ट्रपति कमला ह्यारिसलाई राजनीतिक मशाल सुम्पिन तयार बाइडेनले युक्रेन र चीनलगायत आफ्नो छोराका व्यावसायिक उद्यमहरूमा सहयोग गरेको आरोपलाई बारम्बार अस्वीकार गरेका छन् । रिपब्लिकनहरूले वर्षौँदेखि राष्ट्रपति बाइडेनलाई शर्मनाक बनाउने प्रयासमा हन्टर बाइडेनको विदेशी सम्बन्ध र अराजक निजी जीवनलाई लागुपदार्थको दुर्व्यसनबाट सुधार भएको व्यक्तिका रूपमा प्रयोग गरेका छन् ।
यसैबीच डेमोक्रेटिक नेसनल कन्भेन्सनको उद्घाटनको दिनको प्रयोग गर्दै राजनीतिक हमला शुरु गरेका हुन् । यता अमेरिकी गुप्तचर अधिकारीहरूले पूर्वअमेरिकी राष्ट्रपति डोनाल्ड ट्रम्पको अभियान ह्याक गर्नुको पछाडि इरानको हात रहेको आरोप लगाएका छन् । अमेरिकी गुप्तचर एजेन्सी एफबीआई र अन्य अनुसन्धान एजेन्सीले यस विषयमा संयुक्त वक्तव्य जारी गरेका छन् ।
विज्ञप्तिमा भनिएको छ, ‘इरानले अमेरिकाको चुनावमा लोकतान्त्रिक संस्थाबीच द्वन्द्व बढाउन र विश्वास घटाउन हस्तक्षेप गर्ने निर्णय गरेको थियो।’ विज्ञप्तिमा इरानले सामाजिक इन्जिनियरिङ र अन्य प्रयासमार्फत दुवै राजनीतिक दलको राष्ट्रपति अभियानविरुद्ध यस्तो गर्ने प्रयास गरेको आरोप लगाइएको छ ।
हालै डोनाल्ड ट्रम्पको अभियानले आफ्नो आन्तरिक सञ्चार ह्याक गर्नुको पछाडि इरानी ह्याकरहरूको हात रहेको आरोप लगाएको थियो । तर ट्रम्पको अभियानको यो दाबीलाई इरानी अधिकारीहरूले अस्वीकार गरेका छन् ।
