४ भदौ, विराटनगर ।
फ्रान्सको राजधानी पेरिसमा हालै सम्पन्न पेरिस ओलम्पिकमा आयोजक राष्ट्रलाई रजत पदक दिलाएका प्रशिक्षक थिएरी हेनरीले पदबाट राजीनामा दिएका छन् ।
पेरिस ओलम्पिकलाई ध्यानमा राखेर हेनरीलाई एक वर्षअघि फ्रान्सको प्रशिक्षकमा अनुबन्ध गरिएको थियो । तर, व्यक्तिगत कारण देखाउँदै ४७ वर्षीय हेनरीले पदबाट राजीनामा दिएको फ्रान्सेली फुटबल महासंघले जानकारी दिएको छ ।
ओलम्पिमा आफ्नो देशको लागि रजत पदक जित्नु आफ्नो जीवनको सबैभन्दा ठूलो उपलब्धी रहेको उनले बताए ।
हेनरी फ्रान्सका पूर्वखेलाडी पनि हुन् । उनले सन् १९९८ को विश्वकप विजेता फ्रान्सको टिममा सहभागी थिए । त्यसबाहेक उनले आर्सनल, बार्सिलोना, युभेन्टसलगायत परिचित टोलीबाट व्यवसायिक फुटबल खेलेका छन् ।
उनले सन् २००८-०९ को सिजनमा बार्सिलोनाबाट च्याम्पियन्स लिगको उपाधि पनि जितेका छन् ।
