५ भदौ, विराटनगर ।
विराटनगर महानगरपालिका३ स्थित बालसुधार गृहबाट मंगलबार दिउँसो दुई जना बालक भागेका छन् । हिजो दिउँसो ३ बजेतिर अतिरिक्त क्रियाकलाप भइरहेको मौका पारेर दुई जना बालक भागेका हुन् ।
फरार हुनेमध्ये एक जना कर्तव्य ज्यान तथा डाँका मुद्दामा दोषी ठहर भएका र अर्का जबरजस्ती करणी (बलात्कार) मुद्दामा पुर्पक्षका लागि सुधारगृहमा पठाइएका बालक छन् ।
भागेका बालकहरूमा सुनसरीको कोशी गाउँपालिकाका-२ घर भएका १६ वर्षीय कैद सजाय भोगिरहेका र अर्को सोही उमेरका बराहक्षेत्र नगरपालिका–११ घर भएका र्पुपक्षका लागि बन्दी रहेका बालक छन् ।
कोशी-२ घर भएका बालकलाई अदालतले कर्तव्य ज्यान तथा डाँका मुद्दामा दोषी ठहर गरिसकेको थियो । ती बालकलाई अदालतले २०७९ माघ १६ गते पुर्पक्षका लागि बालसुधार गृहमा पठाउन आदेश दिएको थियो । अदालतले पछि मुद्दाको किनारा लगाउँदा १२ वर्ष ६ महिना कैद सजाय हुने फैसला गरेको थियो ।
बराहक्षेत्र नगरपालिका–११ घर भएका बालकलाई जबरजस्ती करणी मुद्दामा अदालतले गत असार २८ गते पुर्पक्षका लागि सुधारगृहमा पठाउन आदेश दिएको थियो । उनीविरुद्धको मुद्दा अदालतमा विचाराधीन छ ।
भागेका दुबै जना बालकको खोजी भइरहेको मोरङ प्रहरी प्रवक्ता डिएसपी ज्ञानेन्द्रबहादुर बस्नेतले बताए । यहाँ रहेको बालसुधार गृहबाट पटकपटक कैदीबन्दी बालकहरू भाग्दै आएका छन् ।
बालसुधार गृहको क्षमता ५० जनाको भएपनि हाल दुई सय ३८ जना कैदीबन्दी बालकहरु राखिँदै आएको छ । १८ वर्षसम्मका बालबालिकाहरुलाई मात्र सुधार गृहमा राख्नुपर्ने भएपनि मुद्दा फैसलाको कारणले हुँदा एक सय २४ जना १८ वर्ष उमेर माथिका बालबालिका पनि बस्दै आएका छन् ।
