६ भदौ, विराटनगर ।
सुनसरीकाे धरान उपमहानगरपालिकाबाट ठुलो परिमाणमा गाँजासहित ट्रक नियन्त्रणमा लिएको छ । धरान-१३ साराङगबाट ठुलो परिमाणमा ट्रकमा लोड गरेर ल्याउँदै गरेको १४ सय २० किलो गाँजा प्रहरीले बरामद गरेको हो ।
बिहीबार बिहान ९ बजे विशेष सूचनाका आधारमा इलाका प्रहरी कार्यालय धरानबाट खटिएको प्रहरी टोलीले को १ ख ४७३३ नम्बरको ट्रकबाट गाँजा बरामद गरेको हो ।
धनकुटाबाट धरान तर्फ आउँदै गरेको उक्त ट्रक रोकेर चेकजाँच गर्दा ट्रकमा मुलाको बोरासँगै लोड गरिएको ४४ वटा सेतो बोरामा
लुकाइछिपाई ल्याउदै गरेको अवस्थामा गाँजा बरामद गरिएको प्रहरीले जनाएको छ ।
प्रहरीले गाँजा ओसारपसारमा संलग्न दुई जनालाई पक्राउ गरेको छ । पक्राउ पर्नेमा मोरङको सुन्दरहरैंचा नगरपलिका-७ गछियाका ३४ वर्षीय राजकुमार दाहाल र धनकुटाको सहिदभूमि गाउँपालिका-७ का ४१ वर्षीय भुपेन्द्र राई रहेका छन् ।
यस सम्बन्धमा इलाका प्रहरी कार्यालय धरानबाट आवश्यक अनुसन्धान भइरहेको प्रहरीले जनाएको छ ।
