६ भदौ, विराटनगर ।
राष्ट्रिय स्वतन्त्र पार्टी (रास्वपा) का सभापति तथा पूर्वगृहमन्त्री रवि लामिछानेलाई सहकारीको बचत अपचलनबारे छानबिन गर्न बनेको संसदीय विशेष समितिले बयानका लागि बोलाएको छ ।
सहकारी संस्था बचत रकम दुरुपयोग सम्बन्धमा संसदीय छानबिन विशेष समितिले प्रतिनिधिसभा सांसद लामिछानेलाई शुक्रबार बयानका लागि बोलाएको हो ।
सहकारीको रकम अपचलनका विषयमा सोधपुछ गर्न लामिछानेलाई शुक्रवारका लागि बोलाइएको समितिकी सदस्य ईश्वरी न्यौपानेले जानकारी दिइन् ।
उनका साथै भोलि नेपाल प्रहरीका पूर्वडिआइजी छविलाल जोशी बन्जाडे र रवि लामिछानेलाई सोधपुछका लागि बोलाइएको छ ।समितिले गोरखा मिडियाअन्तर्गत सञ्चालित ग्यालेक्सी टेलिभिजन सुरुवाती लगानीकर्ता जोशी र रवि लामिछानेलाई एकै दिन बोलाउने तयारी गरेको हो । पहिले जोशी र त्यसपछि लामिछानेको बयान लिने समितिको तयारी छ ।
जोशीको आमाको निधन भएकाले ६ गतेसम्म ‘काजक्रिया’मा बस्नुपर्ने भएकाले समितिले भोलिका लागि जोशीसहित रविलाई बोलाएको हो ।
गत जेठ १५ गते एमालेका सूर्य थापाको संयोजकत्वमा बनेको छानबिन समिति बनेको समितिले यसअघि आइतबार रास्वपाकै सहमहामन्त्री विपिन आचार्यलाई बोलाएर बयान लिएको थियो ।
सञ्चारकर्ममा हुँदा रवि लामिछानेले जिबी राईसँग मिलेर ग्यालेक्सी टिभी सञ्चालन गर्न विभिन्न सहकारीबाट व्यक्ति र संस्थाको नाममा सहकारीको पैसा अपचलन गरेको आरोप छ ।
उनीहरूले पोखराको सूर्य दर्शन सहकारीबाट १० करोड, सहारा चितवन सहकारीबाट ११ करोड ७१ लाख‚ बुटवलको सुप्रिम सहकारीबाट १० करोड ७४ लाख गरी ३२ करोड ४५ लाख गोर्खा मिडियाको खातामा ट्रान्सफर गरेको आरोप लाग्दै आएको छ ।
गोरखा मिडिया नेटवर्कबाट सञ्चालित ग्यालेक्सी टेलिभिजनमा जीवी राई अध्यक्ष र रवि लामिछाने प्रबन्ध निर्देशक भएर काम गरेका थिए ।
