७ भदौ , काठमाण्डौै ।
सोलुमा हिमताल फुटेर २० घर बगाएको एक सात नबित्दै मुस्ताङमा हिमपहिरो खसेको छ । पहिरोले स्थानीय बोक्सी खेला थुनेकाले स्थानीयले सर्तकता अपनाउन भनिएको छ। अहिलेसम्म ९ परिवारले घर छाडिसकेका छन् ।
मुस्ताङको थासाङ गाउँपालिका वडा नम्बर–२ स्थित कोबाङमा हिमपहिरोका कारण बोक्सीखोला थुनिएको छ । पहिरोका कारण बोक्सीखोलाको ८० प्रतिशत बहाव रोकिदिएको मुस्ताङका डीएसपी भोजराज पाण्डेयले बताएका छन् ।
पहिरोले रोकेको पानीका कारण ठुलो ताल नबनेको तर, पहिरोमा पानी सोसिएर बसेको उनले बताएका छन् । नदी रोकिएको ठाउँभन्दा तल रहेका ९ घर परिवारलाई त्यहाँबाट सुरक्षित स्थलमा सारिएको छ भने सम्भावित दुर्घटनाबारे सचेतना अपनाउन स्थानीयलाई आग्रह गरिएको छ ।
थासाङ गाउँपालिका २ स्थित कोबाङको बोक्सिखोलामाथि हिम पहिरो आएर खोला थुनिएको भन्दै जिल्ला प्रशासन कार्यालयले आसपासका बासिन्दालाई सतर्कता अपनाउन अनुरोध गरेको छ । धौलागिरी हिमश्रृंखलाको मानापानी हिमालमा हिमपहिरो गएको हो ।
गाउँपालिकाका प्रवक्ता गौतम शेरचनका अनुसार मानापानी हिमालमा गएको हिमपहिरो मूलकर्ख हुँदै छिप्लुङसम्म आइपुगेको छ । ‘यो हिउँदमा चौरी र वर्षामा गाइचरण हो’, उनले भने, ‘मानवीय क्षति त छैन, गाईहरुलाई केही भयो कि भन्ने छ ।’ हिमपहिरोले थुनिएको बोक्सीखोला तल गएर कालीगण्डकी नदीमा मिसिन्छ ।
मुस्ताङका सहायक प्रमुख जिल्ला अधिकारी रामप्रसाद सुवेदीका अनुसार प्रमुख जिल्ला अधिकारीको नेतृत्वमा टोली गएको छ । एक साता अघि मात्रै सोलुखुम्बुमा हिमताल विष्फोट हुँदा थामेका २० घर बगेका थिए भने ४ दर्जन घरपरिवार विस्थापित भएका थिए । जलवायु परिवर्तनका कारण उच्च गर्मी भएका कारण हिमताल फुटेको विज्ञहरुले बताएका छन् ।
