९ भदौ , विराटनगर ।
नेपालमा चाहे हवाई होस् वा सडक यात्रा निकै नै जोखिमपूर्ण बन्दै गएको छ । हरेक दिनजसो नै सवारी दुर्घटनाहरु भइरहेका छन् । र सबैभन्दा पीडादायी त के छ भने सार्वजनिक वा धेरै यात्रुहरु बोकेका गाडीहरु एकपछि अर्को गर्दै दुर्घटनामा पर्न थालेका छन् ।यसैबीच आज विहान भरतपुर महानगरपालिका–२९ घुमाउनेमा एउटा बस दुर्घटनामा परेको छ ।
मुग्लिङ–नारायणगढ सडकखण्ड अन्तर्गत घुमाउनेमा बस दुर्घटना हुँदा १७ जना घाइते भएका छन् । महेन्द्रनगरबाट काठमाडौं आउँदै गरेको सुदूरपश्चिम प्रदेश ०२–००१ ख १३३२ नम्बरको बस आज बिहान सवा सात बजे दुर्घटनामा परेको हो ।दुर्घटनामा घाइते हुनेहरूमा १३ जना पुरुष र ४ जना महिला रहेका छन् । उनीहरू मध्ये ५ जना मध्यम र १२ जनाको अवस्था सामान्य रहेको जिल्ला प्रहरी कार्यालय चितवनले जनाएको छ ।
घाइतेहरू सबैको नयाँ मेडिकल कलेज भरतपुरमा उपचार भइरहेको छ ।बस आफैं अनियन्त्रित भई सडकको डिभाइडरमा ठोक्किएर दुर्घटना भएको जिल्ला प्रहरी कार्यालय चितवनले जनाएको छ । सडक किनारमा लगाइएको बारले छेकेकाले बस त्रिशूली नदीमा खस्नबाट जोगिएको छ ।यता शनिबार सिन्धुलीमा भएको दुर्घटनामा सुनकोशी नदीमा खसेको गाडी फेला परेको छ ।
सशस्त्र प्रहरी बल नेपाल विपद् व्यवस्थापन बेश खुर्कोटको गोताखोर टोलीले गाडीलाई नदी किनारमा निकालेको छ ।हिजो साँझ ५ः३० बजे हाइलक्स गाडी सुनकोशीमा खस्दा ३ जना बेपत्ता भएका थिए । भक्तपुरको सूर्यविनायक नगरपालिका ४ बाट हलेसी तीर्थयात्रा गएर फर्किने क्रममा गाडी दुर्घटना भएको हो ।
बेपत्ता हुनेमा गाडी चालक अविन बाके, गाडीमा सवार प्रणीत स्यागु र बलाम घटुवा रहेका छन् । सुनकोशीमा खसेलगत्तै १ जना भने पौडेर बाहिर निस्किएका छन् । नदीबाट सुशान्त कक्षपति पौडिएर बाहिर निस्किएका हुन् ।दुई दिन अघि मात्रै तनहुँको आँबुखैरेनी गाउँपालिका वडा नम्बर २ ऐनापहारा नजिकै भएको बस दुर्घटनामा २७ जना भारतीयको मृत्यु भएको थियो ।
पोखराबाट काठमाडौंका लागि छुटेको ४३ जना सवार भारतीय यूपी ५३ एफटी ७६२३ नम्बरको बस ऐना पहरानजिकबाट मर्स्याङ्दीमा खसेको थियो ।
