९ भदौ, विराटनगर ।
पछिल्लो समय नेपालमा हुने घरेलु फुटबल प्रतियोगितामा दर्शक पाउन मुस्किल हुन्छ । दर्शक आइहाले पनि अधिकांशले निःशुल्क प्रवेशका लागि पास माग्छन् ।
तर, ताप्लेजुङमा जारी अन्तर्राष्ट्रिय आमन्त्रण दोस्रो ताप्लेजुङ गोल्ड कप फुटबल प्रतियोगितामा भने दर्शकले पैसा तिरेर खेल हेरिदिँदा साढे १३ लाख रुपैयाँ संकलन भएको छ ।
प्रतियोगिताको सेमिफाइनलसम्ममा टिकट बिक्रीबाट कुल १३ लाख ६३ हजार सात सय रुपैयाँ संकलन भएको आयोजक लाखे जात्रा सञ्चालन समितिले जनाएको छ ।
सेमिफाइनलका लागि टिकट दर प्रतिव्यक्ति २०० रुपैयाँ र क्वार्टर फाइनलमा टिकट दर १०० रुपैयाँ थियो । तर, भदौ १० गते सोमबार सम्पन्न हुने प्रतियोगिताको फाइनल खेल हेर्न वा अवलोकन गर्नका लागि टिकट दर २५० रुपैयाँ निर्धारण गरिएको छ ।
समितिका अध्यक्ष देवराज गुरुङका अनुसार यस वर्ष प्रतियोगितामा टिकट बिक्री गरेर २० लाख रुपैयाँ सङ्कलन गर्ने आयोजकले लक्ष्य राखेको छ ।
यस वर्ष प्रतियोगिताको विजेताले ट्रफी, मेडल र प्रमाणपत्रसहित पाँच लाख रुपैयाँ राशिको नगद पुरस्कार पाउने छ । उपविजेताले दुई लाख ५० हजार ५५५ रुपैयाँ नगद पुरस्कार प्राप्त गर्ने छ ।
