१० भदौ, विराटनगर ।
करिब अढाइ वर्ष अघि सुरु भएको रुस–युक्रेन युद्धमा पछिल्लो समय युक्रेन आक्रमक देखिएको छ । रुस–युक्रेन युद्धको सुरुआततिर युक्रेनमाथि रुसले निरन्तर धावा बोलेको थियो । तर, केही समययता भने युक्रेनको प्रतिआक्रमण बढ्दो अवस्थामा छ ।
अत्याधुनिक हतियारका साथमा रुसमाथि जाइलागेको युक्रेनले उल्लेखनीय सफलता हात पारिरहेको छ भने रुस शिथिल अवस्थामा देखिएको छ ।
हालैमात्र युक्रेनले ड्रोन खसालेर रुसको ३८ तले आवासीय भवनमा आक्रमण गरेको छ । रुसको साराटोभमा रहेको उक्त आवासीय भवन ‘भोल्गा स्काई’ मा ड्रोन आक्रमण भएको हो । उक्त घटनामा चार जना घाइते भएका छन् ।
आक्रमणबाट भवनको ठुलो हिस्सामा क्षति पुगेको छ । आक्रमणबाट भवनमुनि पार्किङ गरिएका २० भन्दा बढी सवारीसाधनमा क्षति पुगेको छ ।रोयटर्सका अनुसार सोमबार रुसमा २० ड्रोनहरू प्रहार गरिएको थियो । तीमध्ये अधिकतम ९ साराटोभमा हानिएको थियो । मस्कोका गभर्नरले युक्रेनले ड्रोन आक्रमण गरेको दाबी गरेका छन् । यसबारे युक्रेनले भने अहिलेसम्म कुनै प्रतिक्रिया दिएको छैन । जानकारीअनुसार युक्रेनले नै ती ड्रोनहरू खसालेको हो ।
साराटोभ युक्रेनको सीमाबाट ९०० किलोमिटर टाढा छ । यस आक्रमणपछि सबै प्रकारका हवाई गतिविधिमा प्रतिबन्ध लगाइएको छ । सामाजिक सञ्जालमा भाइरल भइरहेको भिडियोमा ड्रोन ‘भोल्गा स्काई’ भवनतर्फ तीव्र गतिमा अघि बढिरहेको देख्न सकिन्छ ।
युक्रेनको बढ्दो प्रतिआक्रमणले गर्दा रुसमा राष्ट्रपति भ्लादिमिर पुटिनप्रति नागरिकले प्रश्न उठाउन थालेका छन् । पछिल्लो समय पुटिनविरुद्ध सामाजिक सञ्जालमा नागरिकले आक्रोश ब्यक्त गर्न थालेको अन्तर्राष्ट्रिय सञ्चारमाध्यमले जनाएका छन् ।
युक्रेनी सेनाको आक्रमणलाई रुसी सरकार र विशेषगरी पुटिनको असफलताका रूपमा हेरिएको छ । पुटिनको युद्ध नीति असफल भएको भन्दै मानिसले उनको राजीनामा माग गरिरहेका छन् ।
