११ भदौ , एजेन्सी ।
अमेरिकी राष्ट्रपति जो बाइडेनले भारतीय प्रधानमन्त्री मोदीसँग कुरा गरेका छन् । बाइडेनले सोमबार मोदीसँग फोनमा कुरा गरेका हुन् ।यस क्रममा दुई नेताबिच युक्रेन, बङ्गलादेशलगायत धेरै क्षेत्रीय र विश्वव्यापी मुद्दामा छलफल भएको बताइएको छ । मोदीले माइक्रो ब्लगिङ वेबसाइट एक्समा यसबारे जानकारी दिएका हुन् ।
यस कुराकानीको सन्दर्भमा ह्वाइट हाउसले विज्ञप्ति नै जारी गरेको छ । बाइडेनले पनि एक्समा एउटा पोस्ट गरेका छन् । बाइडेनले भारतीय प्रधानमन्त्री नरेन्द्र मोदीसँग कुराकानी गरेको ह्वाइट हाउसले आफ्नो विज्ञप्तिमा भनेको छ । कुराकानीमा बाइडेनले मोदीसँग हालैको उनको पोल्यान्ड र युक्रेन भ्रमण र सेप्टेम्बरमा हुने संयुक्त राष्ट्रसंघको महासभाबारे छलफल गरेको बताइएको छ ।
बाइडेनले मोदीलाई पोल्यान्ड र युक्रेनको ऐतिहासिक भ्रमणको सरहाना गरेको विज्ञप्तिमा भनिएको छ । ‘मोदीसँग पोल्यान्ड र युक्रेनको हालैको भ्रमणबारे छलफल गर्न फोन गरेको थिएँ अनि शान्तिको लागि उनको सन्देश र युक्रेनको लागि जारी मानवीय समर्थनको प्रशंसा पनि गरे ।’
पोष्टमा बाइडेनले लेखेका छन् । फोन वार्ताबारे भारतले जारी गरेको वक्तव्यमा बङ्गलादेशको मुद्दामा समेत कुराकानी भएको बताइएको छ । तर, अमेरिकाले जारी गरेको विज्ञप्तिमा बङ्गलादेशको नाम कतै उल्लेख भएको छैन ।
