१३ भदौ ,काठमाण्डौ ।
कांग्रेस सभापति शेरबहादुर देउवा र उनकी पत्नीसमेत रहेकी परराष्ट्रमन्त्री आरजु राणा देउवामाथि फेसबुकमा टिप्पणी गरेको आरोपमा पक्राउ परेका कैलाली धनगढीका दुई युवालाई प्रहरीले रिहा गरेको छ ।
जिल्ला प्रहरी कार्यालयले फेसबुकमा ‘स्टाटस’ लेखेको आरोपमा धनगढीका प्रतीक जोशी र रचित शाहलाई मंगलबार दिउँसो नियन्त्रणमा लिई राति छाडेको हो । पक्राउ गर्नुको कारण खुलाएको छैन । तर, शान्तिसुरक्षामा खलल नपु¥याउने कागज गराएर उनीहरूलाई रिहा गरिएको छ ।
जिल्ला प्रहरी कार्यालयका प्रवक्ता प्रहरी नायब उपरीक्षक कविन्द्रसिंह बोहराले मौखिक उजुरीका आधारमा दुईजनालाई केहीबेर नियन्त्रणमा लिइएको बताए । उनले कस्तो खालको उजुरी भन्नेबारे खुलाएनन् । फेसबुकमा आफूले कुनै आपत्तिजनक विषय नलेखे पनि प्रहरीले आफूलाई नियन्त्रणमा लिएको प्रतीकले बताए ।
‘मुलुक अहिले वास्तवमा संकटै संकटमा छ, आमजनता संकटको अवस्थामा छन्,’ प्रतीकले लेखेका थिए, ‘संस्कार नभएका भनेर बोलेको लोकलाजको विषय बनेको छ । तपाईंहरूको प्रजातन्त्रमा यस्तै हुन्छ ?’ शान्तिसुरक्षामा खलल नपु¥याउने कागज गराएर प्रहरीले राति रिहा गरेको उनले बताए ।
रचितले पाँचपटक प्रधानमन्त्री हुँदा पनि देउवाले केही काम गर्न नसकेको, भुटानी शरणार्थी काण्डमा पूर्वगृहमन्त्रीलाई पार्टीबाट कारबाही नगरेको र गिरीबन्धु घोटालाका आरोपितलाई प्रधानमन्त्री बनाएको आशयले स्टाटस लेखेका थिए ।
प्रतीकका अनुसार अपराह्न चार बजेतिर बोराडाँडीमा खाजा खाने क्रममा आएका प्रहरीले सोधपुछ गर्नु छ भनेर दुवैजनालाई नजिकैको प्रहरी बिटमा लगेका थिए । ‘त्यहाँबाट जिल्ला प्रहरी कार्यालय जानुप¥यो भनेपछि आफ्नै गाडीमा जिल्ला प्रहरीमा गयौँ,’ प्रतीकले भने, ‘डेढ घण्टासम्म परिसरमा राख्यो । पछि प्रहरीले फेसबुक प्रोफाइलमा के छ, पढाइ, राजनीतिक आस्था के हो भनेर सोधे ।’
सामान्य सोधपुछपछि गार्डसेलमा लगेर राखेको उनले बताए । प्रतीकका अनुसार करिब डेढ घण्टा गार्डसेलमा राखेपछि दुवैजनालाई थुनुवा कक्षभित्र राखिएको थियो । थुनुवा कक्षबाट हतकडी लगाएर स्वास्थ्य जाँचका लागि सेती प्रादेशिक अस्पताल लगिएको उनले बताए ।
‘शान्तिसुरक्षामा खलल नपु¥याउने कागज गराएर राति रिहा ग¥यो,’ उनले भने, ‘सोधपुछका क्रममा प्रहरीले शान्तिसुरक्षामा चुनौती भयो भने, तर हामीलाई किन पक्राउ गरेको स्पष्ट बताएनन ।’ पक्राउ गरेर हतकडी लगाउनुपर्ने गरी अपराध नगरेको उनले बताए ।
‘हामीले वाक् स्वतन्त्रताको प्रयोग गरेका हौँ, शान्तिसुरक्षा बिथोल्ने योजना थिएन,’ उनले भने, ‘नियन्त्रणमा लिनुपर्ने कारण थिएन ।’ करिब डेढ घण्टा थुनुवा कक्षमा बस्नुपरेको उनले बताए । परराष्ट्रमन्त्री देउवा पूर्वनिर्धारित कार्यक्रमअनुसार बुधबार बिहान धनगढी पुगेकी थिइन् ।
यता गौरा पर्वको अवसरमा काठमाडौंको टुँडिखेलमा उपस्थित प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवाविरुद्ध नाराबाजी गरेको भन्दै पक्राउ परेका तीन जनालाई सार्वजनिक शान्तिविरुद्धको मुद्दामा अनुसन्धान थालिएको छ ।
काठमाडौं प्रहरी परिसरका एसपी नवराज अधिकारीका अनुसार पक्राउ परेका तीन जनाले सार्वजनिक स्थलमा गर्न नहुने कार्य गरेको पाइएको छ । अधिकारीका अनुसार उनीहरुलाई सार्वजनिक शान्तिविरुद्धको कसुरमा अनुसन्धान अघि बढाइएको छ ।
प्रधानमन्त्री ओली गौरा पर्वको कार्यक्रममा उपस्थित हुनासाथ उनीविरुद्ध काठमाडौंको टुँडिखेलमा नाराबाजी भएको थियो । सुदूरपश्चिमको मुख्य चाड गौरा पर्वमा गएका प्रधानमन्त्री ओलीविरुद्ध दर्शकदीर्घाको अन्तिम लहरबाट नाराबाजी भएको थियो ।
मञ्चको केही टाढाबाट नाराबाजी गरेको भिडियो सामाजिक सञ्जालमा सार्वजनिक भएको छ । उनीहरुलाई केही राजनीतिक दल र नेताले उचालेको आशंका प्रहरीलाई छ । यस्तो नाराबाजी गरेको आरोपमा पक्राउ परेका सुर्खेतका गोपीकृष्ण जैसी, कञ्चनपुरका दीपक ठगुन्ना र अछामका रामबहादुर बुढालाई पक्राउ गरिएको हो ।
नाराबाजी गरेलगत्तै दुई जनालाई पक्राउ गरिएको थियो भने थप एक जनालाई बुधबार पक्राउ गरिएको प्रहरीले जनाएको छ । उनीहरूले काठमाडौं महानगरपालिकाका मेयर बालेन शाहको पक्षमा भने हुटिङ गरेका थिए ।
नाराबाजीको अन्त्यतिर उनीहरूले ‘बालेन, बालेन’ भनेर हुटिङ गरेका थिए । लगातार हुटिङ भएपछि सम्बोधनका लागि पुगेका कांग्रेस सभापति देउवा उनीहरुप्रति झनै आक्रोशित भएका थिए । नाराबाजी झन् चर्को बनेपछि देउवाले रिस थाम्न सकेनन् ।
सुरुमा त उनले ‘जति कराउनु छ, तपाईंहरू कराउनुस’ भने । दर्शकदीर्घाबाट आवाज झन् चर्को बन्यो । देउवा पनि के कम, औँला ठड्याएरै भने, ‘लाज पनि छैन, अर्काको कार्यक्रम बिथोल्ने ? लाज नभएकाहरू, बदमासहरू ।’
‘यही हो नेपालको संस्कृति, यही हो नेपालको चलन ? यही सिकेर आएको ? बदमासहरू’ आफ्नै शैलीमा देउवाले उनीहरुलाई हप्काउँदै भनेका थिए । यो घटनापछि काठमाडौं प्रहरीमाथि समेत शान्ति सुरक्षा कायम गर्न नसकेको भन्दै राजनीतिक दबाब परेको थियो ।
