१८ भदौ, विराटनगर ।
उरुग्वेका स्ट्राइकर लुइस स्वारेजले अन्तर्राष्ट्रिय फुटबलबाट सन्न्यासको घोषणा गरेका छन् । ३७ वर्षीय स्वारेजले सोमबार अन्तर्राष्ट्रि खेलबाट सन्न्यास लिएको घोषणा गरे ।
स्वारेजले आफ्नो राष्ट्रको जर्सीमा विश्वकप छनोटअन्तर्गत पराग्वेसँग खेल्दै विश्राम लिने छन् । घरेलु मैदानमा शुक्रबार हुने खेल नै स्वारेजका लागि अन्तिम अन्तर्राष्ट्रिय खेल हुने छ ।
स्वारेजले उरुग्वेका लागि सर्वाधिक धेरै गोल गरेका छन् । उनले १४२ खेलमा ६९ गोल गरेका छन् । लिभरपुल र बार्सिलोनाका पूर्वफरवार्ड सुआरेजले सन्न्यास घोषणा गर्दै भनेका छन्, ‘यो भन्न पाउँदा दुःख लाग्छ, तर शुक्रबार मेरो देशको राष्ट्रिय टोलीसँग अन्तिम खेल हुनेछ ।’
उनले सन् २००७ देखि उरुग्वेका लागि खेल्दै आएका थिए । उनले उरुग्वेको टोलीमा चार विश्वकप र पाँच कोपा अमेरिका प्रतियोगिताका खेलेका छन् । उनले सन् २०११ को महादेशीय प्रतियोगिताको उपाधि जितेका थिए ।हाल उनी अमेरिकन क्लब इन्टर मियामीबाट व्यावसायिक फुटबल खेलिरहेका छन् । उनले अजाक्स, लिभरपुल, एट्लेटिको मड्रिड र ग्रेमियोबाट पनि खेलेका थिए ।
