२० भदौ, विराठनगर ।
काठमाडौं महानगरपालिकाका मेयर बालेन्द्र शाह (बालेन) का समर्थकहरूले चलाएको ‘फलो-अनफलो’ अभियानले गर्दा प्रधानमन्त्री केपी शर्मा ओलीलाई फेसबुकमा ७७ हजार फलोअर्स गुमाएका छन् ।
मंगलबार नेकपा एमालेका कार्यकर्ताहरूले फेसबुक पोस्टमा ‘रिपोर्ट’ गरेर आफ्नो स्टाटस नै हटेको संकेत गरेपछि बालेन समर्थकहरूले ‘फलो-अनफलो’ अभियान चलाएका थिए ।
बालेन समर्थकको अभियानमा केही युवाहरू पनि जोडिएर प्रधानमन्त्री ओलीसहित शीर्ष नेताहरूलाई सामाजिक सञ्जाल फेसबुकमा अनफलो गर्न थालेका थिए । भने, बालेनलाई फलो गर्न सबैप्रति आग्रह गर्ने अभियान पनि उनीहरूको थियो ।
जसबाट एमाले अध्यक्षसमेत रहेका प्रधानमन्त्री ओलीले ७७ हजार फलोअर्स गुमाएका हुन् भने बालेनका झन्डै एक लाख फलोअर्स बढेका हुन् ।मंगलबार र बुधबार धेरै फलोअर्स गुमाएका ओलीलाई आज भने अनफलो गर्नेहरू संख्या घट्दो छ । बालेनका समर्थकले ओलीविरुद्ध यो अभियान चलाउनुअघि फेसबुकमा ओलीका फलोअर्स ६ लाख ६६ हजार थिए । बिहीबार दिउँसोसम्ममा उनका फलोअर्स ७७ हजार घटेर ५ लाख ८९ हजारमा झरेको छ ।
बालेनका फलोअर्स भने फेसबुकमा २१ लाख छन् । यो अभियानको थालनी हुनुभन्दा पहिले उनका फलोअर्स २० लाख थिए ।
विशेषगरी, काठमाडौं महानगरपालिकाका मेयर शाहको फेसबुक स्टाटसलाई लिएर ओलीका फलोअर्स घटेका हुन् । बालेनले बालबालिकासम्बन्धी कसूर गरेको आरोप लागेकी एमालेकी प्रदेश सांसद रेखाकुमारी शर्मालाई पक्राउ गर्न प्रधानमन्त्री ओलीलाई फेसबुकमार्फत दबाब दिएका थिए ।
सो पोष्ट एमालेका कार्यकर्ताले रिपोर्ट हानेपछि डिलिट भएको बताइएको छ । मंगलबार अपराह्न मेयर बालेनले आफ्नो स्टाटस हटाइएको दाबीसहितको पोस्ट गरेका थिए । उनले सरकारकै संलग्नतामा आफ्नो स्टाटस हटाइएको संकेत गरेका थिए ।
आफ्नो फेसबुक पोस्ट् डिलिट भएपछि बालेनले लेखेका छन्, ‘पोस्ट उडाउने हैन, दोषी समाऊ सरकार । म गलत हो भने मलाई समाऊ, होइन भने दोषी समाऊ ।’
सांसद शर्मामाथि एक नाबालिकालाई विगत आठ वर्षदेखि बाल श्रमिक बनाएर राखेको आरोप लागेको छ । शर्मा लुम्बिनी प्रदेश सांसद हुन् । उनको काठमाडौँस्थित घरमा १४ वर्षीया बालिकालाई ८ वर्षदेखि बाल श्रमिकका रुपमा राखेको पाइएपछि महानगरपालिकाले उद्धार गरेको थियो ।
फेसबुक पोस्ट डिलिट भएपछि बालेन समर्थकहरूले प्रधानमन्त्री ओलीको फेसबुक अनफलो अभियान चलाएर विरोध गरेका हुन् ।
