२० भदौ, विराटनगर ।
हराएको ४० वर्षपछि एक गाउँले घर फर्किएपछि धनकुटाको महालक्ष्मी नगरपालिका-९ आहालेमा खुसी छाएको छ । चार दशकदेखि बेपत्ता बनेका तेजबहादुर भण्डारी अकस्मात बुधबार (हिजो) घर फर्किएपछि आहालेमा खुसियाली छाएको हो ।
साबिकको मूर्तिढुंगा गाविस-२ बाट १९ वर्षको उमेरमा २०४१ सालयता तेजबहादुर बेपत्ता बनेका थिए । बुधबारमात्र तेजबहादुरलाई भारतबाट उनका साहुले घर ल्याइदिएका हुन् ।
तेजबहादुरलाई उनका साहु हेमन्त चौधरीले भारतको उत्तर प्रदेशबाट सोधपुछ गर्दै यहाँसम्म ल्याइदिएको उनका दाजु प्रेम भण्डारीले जानकारी दिए ।
उनका अनुसार तेजबहादुरका साहुले नेपाल नै आएर ५० हजार दिएर बुधबार नै भारत फर्किए । चौधरीले महिनाको पाँच हजार हाल्दिने भन्दै दाजुको बैंक अकाउन्ट नम्बर लिएर फर्किएको प्रेमको भनाइ छ ।
‘भाइले एउटा कापीमा आफ्नो ठेगाना लेखेको रहेछ,’ प्रेमले नेपाल टाइम्ससँगको कुराकानीमा भने, ‘जोगबनी-विराटनगर-धनकुटा भनेर गरिएको टिपोट हेरेर साहुले सोध्दैखोज्दै ल्याइदिएका छन् । रोड परमिट थोरै हुँदा फेरि आउने बाचासहित हिजै साहु फर्किए ।’
उनका अनुसार घरबाटै बेपत्ता बनेका तेजबहादुर कामका लागि भौतारिँदै केही साथीसँग विराटगर-जोगबनी हुँदै उत्तर प्रदेशसम्म पुगेका थिए । तर, उत्तर प्रदेश पुगेपछि उनका साथीहरू छिन्नभिन्न भए ।
तेजबहादुरले एउटा होटलमा काम पाए । र, त्यहाँ कुकको काम गर्न थाले । तर, कामको पारिश्रमिकले मदिरा पिउने बानी बसेपछि साहुले उनको तलब राखिदिने गरेका थिए ।
यसबीचमा एक महिनाअघि उनलाई घरको याद आएपछि साहुले सोधखोज गर्दै घरैसम्म ल्याइदिएका हुन् । फर्किनेबेलामा मासिक रूपमा बैंक खातामा उनको पारिश्रमिक पठाउने प्रतिबद्धतासहित चौधरी आँसु झार्दै बिदा भएको प्रेमले बताए ।
तेजबहादुरका बुवा टंकबहादुर भण्डारीको सात वर्षअघि र आमा शुभद्राको १० वर्षअघि मृत्यु भइसकेको छ । अहिले तेजबहादुरका दाजु-भाउजु र तीन जना भतिजाहरू रहेका छन् ।
उमेरले ५९ वर्ष पुगेका तेजबहादुरको बिहे पनि भएको छैन र उनीसँग नेपाली नागरिकता पनि छैन । अब, नागरिकताको प्रक्रिया थाल्ने योजनामा रहेको दाजु प्रेम भण्डारीले सुनाए ।
