२१ भदौ , काठमाण्डौ।
बर्दियामा पर्यटक घुमाउन लगेका एक गाइडको गैँडाको आक्रमणबाट मृत्यु भएको छ । अमेरिकी नागरिकसहित दुई जना घाइते भएका छन् । सामुदायिक वनको अवलोकन गर्ने क्रममा विदेशी पर्यटकलाई गैँडाले आक्रमण गरेको प्रहरीले जनाएको छ । स्थानीय परशुराम चौधरीका अनुसार बच्चासहितको गैँडासँग जम्काभेट हुँदा उनीहरू आक्रमणमा परेका थिए ।
विदेशी पर्यटकलाई जोगाउन खोज्दा चौधरीको मृत्यु भएको हो । गैँडाले आक्रमण गर्दा विदेशी पर्यटकलाई बचाउन खोज्दा पथ प्रदर्शक ठाकुरद्वारा नगरपालिका–९ का ३५ वर्षीय मनमोहन चौधरीको घटनास्थलमा मृत्यु भएको चितवन प्रहरीले जनाएको छ । यसै गरी गैँडाको आक्रमणमा अमेरिकन पर्यटक एमसी सावन र उक्त वनको चौकीदार खिन्चु थारु घाइते भएको प्रहरीको भनाइ छ ।
उनीहरूलाई ठाकुरबाबास्थित नगर अस्पतालमा उपचारका लागि पठाइएको छ । चौधरीको अवस्था सामान्य भए पनि अमेरिकन पर्यटकलाई गम्भीर चोट लागेको छ । सो घटना शुक्रवार बिहान भएको थियो । गएको चैतमा मात्रै नवलपरासी (बर्दघाट सुस्तापूर्व)को कावासोतीमा गैंडाको आक्रमणमा परी एक जनाको मृत्यु भएको थियो ।
गैंडाको आक्रमणबाट कावासोती नगरपालिका–१०, रतवल निवासी ९० वर्षीया जगरीमाया महतोको मृत्यु भएको थियो । बर्दिया राष्ट्रिय निकुन्जमा बाघले समेत मानिसमाथि आक्रमण गर्दै आएको छ । बाघको आक्रमणबाट त्याहा अहिलेसम्म झन्डै एक दर्जन ब्यक्तिले ज्यान गुमाइसकेका छन् ।
