२२ भदौ, एजेन्सी ।
चौथो संस्करणको युरोपियन नेसन्स लिगअन्तर्गत बेल्जियम र इजरायलले बन्द रंगशालामा खेल्नु परेको थियो । नेसन्स लिगका अरू खेलमा आफ्नो स्टेडियमभरि दर्शक हुँदा बेल्जियम र इजरायलले भने अर्काको बन्द रंगशालामा खेल्नुपरेको हो ।
इजरायल-हमास युद्ध जारी रहेका बेला बेल्जियमका थुप्रै सहरले सुरक्षाको जोखिम औंल्याउँदै यो खेल आयोजना गर्न अस्वीकार गरेका थिए । त्यसपछि युरोपियन फुटबल महासंघले उक्त खेल हंगेरीमा बिनादर्शक खेलाउने निर्णय गरिएको थियो ।
गत अक्टोबरमा बेल्जियम र स्विडेनबिचको युरो २०२४ छनोट खेलअघि एक बन्दुकधारीले दुई स्विडिस समर्थकको हत्या गरेका थिए ।
युइएफएले बेल्जियमको किङ बाउडिन स्टेडियममा गराउने तय गरेको थियो । तर, बेल्जियम फुटबल संघले भने सुरक्षा चुनौती हुने भन्दै अस्वीकार गरेपछि हंगेरीमा दर्शकबिना खेलाइएको हो ।शुक्रबार राति हंगेरीको डिब्रिसेनस्थित नाइजेर्डी स्टेडियममा भएको समूह चरणको पहिलो खेलमा बेल्जियमले इजराइललाई ३-१ गोलले हराएको थियो ।
बेल्जियमलाई जिताउन केभिन डी ब्रुयनले दुई गोल गर्दा युरी टाइलेमान्सले एक गोल गरे । इजराइलले भने एउटा आत्मघाती गोल उपहारमा पाएको थियो ।
खेलको २१औं मिनेटमा ब्रुयनले गोल गर्दै बेल्जियमलाई सुरुआती अग्रता दिलाएका थिए । खेलको ३६औं मिनेटमा बेल्जियमका टिमोथी कास्टाग्नेले आफ्नै पोस्टमा गोल गरेपछि इजराइल बराबरीमा फर्किएको थियो ।
बेल्जियमका टाइलेमान्सले ४८औं मिनेटमा गोल गर्दै घरेलु टोलीलाई पुनः अग्रता दिलाए । ५२औं मिनेटमा ब्रुयनले पेनाल्टीमा गोल गर्दै बेल्जियमलाई ३-१ गोलको जित दिलाए । जितसँगै बेल्जियमले तीन अंक जोडेको छ ।
