२३ भदौ, विराटनगर ।
नेपाली खेलकुदकी शीर्ष महिला संगीना वैद्यले तालिम तथा प्रशिक्षण विभागको उपनिर्देशक पदबाट राजीनामा दिएकी छन् । युवा तथा खेलकुदमन्त्री तेजुलाल चौधरीको ठाडो निर्देशनमा वरीयता मिचेर निर्देशक नियुक्ती गरेपछि विरोधस्वरूप उनले उपनिर्देशक पदबाट राजीनामा दिएकी हुन् ।
संगीना आठौं तथा नवौं साफका साथै एसियन च्याम्पियनसिपमा स्वर्ण पदक जितेकी नेपाली तेक्वान्दोकी खेलाडी हुन् । उनी लामो समयदेखि तालिम तथा प्रशिक्षण विभागमा उपनिर्देशकको भूमिकामा थिइन् ।
तर, विभागका निर्देशक बक्सिङका वरिष्ठ प्रशिक्षक प्रचण्ड शर्मा सेवा निवृत्त भएपछि उनको ठाउँमा वरिष्ठताको आधारमा आफूले नेतृत्व पाउनुपर्ने संगीनाको अपेक्षा थियो ।
तर, मन्त्री चौधरीको ठाडो निर्देशनमा गतसाता पूर्वाञ्चलमा कार्यरत वरिष्ठ कराते प्रशिक्षक सोवित प्रसाईंलाई निर्देशक बनाइएपछि संगीनाले राजीनामा दिएकी हुन् । वरिष्ठताको वरीयता मिचेर निर्णय गरिएपछि आइतबार उपनिर्देशक पदबाट राजीनामा दिएको उनले बताएकी छन् ।को हुन् संगीना ?
नेपाली खेलकुदमा ‘तेक्वान्दो क्वीन’ नामले परिचित संगीना सदावहार सफलताको पर्याय हुन् । सन् १९९१ देखि तेक्वान्दो खेल्न सुरु गरेकी उनले अन्तर्राष्ट्रिय प्रतियोगितामा १० स्वर्ण, एक रजत र दुई कांस्य जितेकी छन् ।
संगीना सन् २००४ को एथेन्स ओलम्पिकमा छनोट चरण पार गरेर ओलम्पिक यात्रा तय गर्ने पहिलो नेपाली महिला खेलाडी हुन् । सोझै ओलम्पिकमा छनोट भएर खेल्ने संगीनाको कीर्तिमान भेट्टाउन अझै कसैले सकेको छैन ।
सागमा दोहोरो स्वर्ण र एसियन च्याम्पियनसिपमा पदक चुम्न सफल संगीनाले चोटका कारण खेलबाट २०६६ सालमा सन्न्यास लिइन् ।सक्रिय खेलबाट सन्न्यास लिँदा उनलाई कार पुरस्कार प्रदान गरिएको थियो ।
विभागीय टोली त्रिभुवन आर्मी क्लबको प्रशिक्षक संगीनाले नेपालमै भएको १३ औं सागमा नेपाली तेक्वान्दोको टोलीको प्रशिक्षण पनि सम्हालिन् । १३ औं सागमा नेपाली तेक्वान्दोलाई प्रशिक्षकको रूपमा १२ स्वर्ण, ६ रजत र ११ कांस्य गरी २९ पदक जिताउन सफल उनी अहिले राष्ट्रिय खेलकुद परिषद् (राखेप) अन्तर्गत तालिम तथा प्रशिक्षण विभागको उपनिर्देशक रहेकी थिइन् ।
