२३ भदौ, काठमाडौं ।
काठमाडौंको गोकर्णेश्वर नगरपालिका-१ सुन्दरीजलस्थित ढुंगाको चेपभित्र शंकास्पद अवस्थामा शव भेटिएको महिलाको हत्या उनकै प्रेमीले गरेको खुलेको छ ।
हत्या आरोपमा प्रहरीले सर्लाही चक्रघट्टा गाउँपालिका ३ बस्ने ४० वर्षका रामविनय महरा र सर्लाहीकै बसगरिया गाउँपालिका ५ घर भई हाल काठमाडौं बसुन्धारा बस्ने २४ वर्षका सन्तोसराम महरालाई पक्राउ गरेको छ । विनय सन्तोषका फुपाजु हुन् ।
गत बिहीबार बिहान करिब ९:४५ बजे सुन्दरीजलस्थित बागमतीको किनारमा शंकास्पद अवस्थामा एक अपरिचित महिलाको शव फेला परेको थियो । हत्या भएकी महिला सिरहा घर भई काठमाडौंको बसुन्धारा बस्दै आएकी राम दुलारी रहेको प्रहरीको भनाइ छ । महराले मृतक महिला सिराहा घर भई काठमाडौं ३ बसुन्धारा बस्दै आएकी रामदुलारी रहेको बयान प्रहरीसमक्ष दिएका हुन् ।
टाउकामा चोट देखिएपछि घटनाको अनुसन्धानलाई थप तीव्रता दिएको प्रहरीले राम दुलारीको हत्या भएको निष्कर्ष निकालेको थियो । घटनाबारे अनुसन्धानमा जुटेको जिल्ला प्रहरी परिसर काठमाडौंको टोलीले घटनाको दुई दिनपछि शनिबार महिलाका प्रेमीसहित दुई जनालाई बसुन्धरा क्षेत्रबाट नियन्त्रणमा लिएको हो ।
काठमाडौंका प्रहरी उपरीक्षक (एसपी) नवराज अधिकारीका अनुसार पक्राउ परेका राम विनय महरा मृतक महिलाको प्रेमी हुन् । राम विनय पुलमुनि जुत्ता सिलाउने काम गर्दै आएका थिए भने मृतक रामदुलारी मजदुरीको काम गर्ने गरेको खुल्न आएको प्रहरीले जनाएको छ ।
पक्राउ परेका विनयले आफू र मृतक दुलारीबीच दुई वर्ष अघिदेखि चिनजान भएको र प्रेम सम्बन्ध रहेको बताएका छन् । मृतक दुलारीले दिनहुँ जाँडरक्सी खाने तथा अन्य पुरुषसँग पनि सम्बन्धमा रहेको आशंका गरी उनका प्रेमी राम विनय महराले हत्या गर्ने योजना बनाएका थिए ।
उनको योजनाअनुसार सन्तोष महरासँग मिलेर घटनाको दिन घुम्न जाने भन्दै दुलारीलाई सुन्दरीजल पुर्याएका थिए । घटनास्थलमा लगी विनय र सन्तोषले दुलारीलाई अग्लो स्थानबाट धकेलेर घाइते बनाएका थिए । दुलारी घाइते अवस्थामै रहेका बेला उनीहरू दुवै जनाले पालैपालो ढुंगाले पटक-पटक टाउकोमा प्रहार गरी हत्या गरेको प्रारम्भिक अनुसन्धानबाट खुल्न आएको प्रहरीको भनाइ छ ।
हत्यापछि बोक्सेदहकै ढुंगाको कापमा दुलारीको शव लुकाएर उनीहरु त्यहाँबाट हिँडेको पाइएको प्रहरीले जनाएको छ । हत्यापछि उनीहरुले सुन्दरीजलस्थित बागमती नदी किनारमा ढुंगाको चेपमा शव व्यवस्थापन गरेका प्रहरीले जनाएको छ ।
