२३ भदौ , एजेन्सी ।
अमेरिकामा केही दिनअघि नेपाली विद्यार्थी मुना पाण्डेलाई गोली हानी हत्या गरेको आरोपमा पक्राउ परेका भारतीय नागरिक बबी सिंह नेपालमै जन्मिएको खुलेको छ । त्यो पनि राजधानी काठमाडौंमै । भारतीय नागरिक बबीको जन्म कसरी नेपालमा भयो ? अनि उनी कहिले अमेरिका गए ?
सन् १९६० ताका बबीका पिता दर्शन सिंह भारतको जम्मु–काश्मिरबाट नेपाल आएका थिए । यहाँ आएर उनले ‘ट्रान्सपोर्ट’मा काम गर्न थाले । त्यसपछि उनले रेष्टुरेन्ट व्यवसाय सुरु गरे । काठमाडौंको सुन्धारामा ‘इन्द्रपुरी’, पाखोमा ‘मोतीमहल’, थापाथली चोकमा ‘पञ्जाबी ढाबा’ उनले खोलेका थिए ।
दर्शनले काठमाडौंमा व्यवसाय गरिरहँदा बबीको जन्म पनि डिल्लीबजारमै भएको हो । बबीसंगै उनका अर्का छोरा अर्थात बबीका दाजु अमीत पनि थिए । बबीले ललितपुरको सेन्ट जेभियर्स स्कुल त्यसपछि मोडर्न इन्डियन स्कुलबाट उच्च मावि तहसम्मको अध्ययन गरेका थिए । त्यसपछि झण्डै ३० वर्षअघि उनी अमेरिका गएका थिए ।
यो खुलासा दर्शन र बबीको परिवारलाई नजिकबाट चिनेका हरपाल सिंहले गरेका हुन् । उनीहरुले परिवार अहिले नेपालमा नरहेको समेत उनले बताएका छन् । उनै बबी अघिल्लो हप्ता ह्युस्टनस्थित अपार्टमेन्टमा मुनालाई गोली हानी हत्या गरेको आरोपमा पक्राउ परेका हुन् । वेष्ट एअरपोर्ट ब्लुभर्डमा रहेको मुनाको अपार्टमेन्टमा प्रवेश गरेर बबीले गोली प्रहार गरेका थिए ।
मुनालाई उनले के कारणले गोली प्रहार गरेका हुन् भन्नेबारेमा अहिलेसम्म स्वतन्त्र पुष्टि हुन सकेको छैन् । बबी मुनाको कोठामा ओछ्यानसम्मै पुगेर गोली हानेर बाहिरिएको अमेरिकाबाट प्रकाशित हुने अनलाइन सञ्चारमाध्यमले जनाएका छन् । मुनालाई चारवटा गोली प्रहार गरिएको जनाइएको छ ।
मुनालाई गोली हानेर हत्या गरेको आरोपमा पक्राउ परेका बबी सिंह शाहले उनलाई लगातार पिछा गरेको खुलेको छ । हत्या आरोपमा पक्राउ परेका ५१ वर्षीय सिंह अघिल्लो साताको शनिबार रातितिर मुनाकै कोठाको ढोकातर्फ गएको सीसीटीभी फुटेजमा देखिएको छ । प्रहरी हिरासतमा रहेका बबीले अमेरिका पुगेपछि भारतीय मूलकी एक युवतीसँग विहे भएको तर पछि एउटा बच्चा भएपछि छाडेको पनि खुलेको छ ।
पक्राउ परेका सिंहमाथि अदालतमा ‘जघन्य हत्या’को अभियोगमा मुद्दा दायर भएको छ । टेक्सासमा जघन्य हत्या अदालतले पुष्टि गरेमा मृत्युदण्डसम्म हुन सक्ने कानुनी व्यवस्था रहेको छ ।
